Live Updates

خیبر پختونخوا کا عوام دوست اور ترقیاتی بجٹ قابلِ تحسین ہے، محمد سہیل آفریدی

ہفتہ 14 جون 2025 21:00

پشاور (اُردو پوائنٹ اخبارتازہ ترین - اے پی پی۔ 14 جون2025ء) وزیر اعلیٰ خیبر پختونخوا کے معاونِ خصوصی برائے مواصلات و تعمیرات محمد سہیل آفریدی نے مالی سال 2025-26 کے لیے صوبائی اسمبلی میں پیش کیے گئے 2119 ارب روپے کے بجٹ کو جامع، عوام دوست اور ترقیاتی وژن کا عکاس قرار دیا ہے۔ انہوں نے کہا کہ موجودہ معاشی مشکلات اور چیلنجز کے باوجود حکومت خیبر پختونخوا نے جو بجٹ پیش کیا ہے، وہ ایک دور اندیشانہ اور متوازن دستاویز ہے، جو عوامی فلاح، بنیادی سہولیات کی فراہمی اور معاشی استحکام کے اہداف پر مرکوز ہے۔

معاون خصوصی نے کم سے کم اجرت کو 36 ہزار روپے سے بڑھا کر 40 ہزار روپے کرنے کی تجویز کو مزدور طبقے کے لیے ایک حقیقی ریلیف قرار دیا، اور سرکاری ملازمین کی تنخواہوں میں 10 فیصد جبکہ پینشن میں 7 فیصد اضافے کو ایک احسن اور ہمدردانہ فیصلہ قرار دیا۔

(جاری ہے)

محمد سہیل آفریدی نے کہا کہ مواصلات و تعمیرات کا محکمہ صوبے کی ترقی میں ریڑھ کی ہڈی کی حیثیت رکھتا ہے۔

ہم اپنی سڑکوں، پلوں اور دیگر انفراسٹرکچر کو جدید خطوط پر استوار کرنے کے لیے پرعزم ہیں۔ ان منصوبوں سے نہ صرف نقل و حمل کے نظام میں بہتری آئے گی بلکہ ہزاروں لوگوں کو روزگار کے مواقع بھی میسر آئیں گے۔ انہوں نے مزید کہا کہ ترقیاتی بجٹ میں شامل منصوبے شہری اور دیہی دونوں علاقوں کو یکساں ترقی کے مواقع فراہم کریں گے، اور خیبر پختونخوا کو خوشحال، مربوط اور پائیدار ترقی کی راہ پر گامزن کریں گے۔ سہیل آفریدی نے اس اُمید کا اظہار کیا کہ بجٹ میں شامل پالیسی فیصلے عوامی توقعات پر پورا اتریں گے اور ہر طبقے کو اس کے ثمرات جلد ملنا شروع ہو جائیں گے۔