؁لاہور کو صاف ستھرا اور مثالی شہر بنانے کیلئے ڈپٹی کمشنر لاہور سید موسیٰ رضا کی قیادت میں ضلعی انتظامیہ نے عملی اقدامات تیز

شہر بھر میں صفائی، سیوریج اور تجاوزات جیسے عوامی مسائل کے فوری حل کیلئے مربوط حکمت عملی پر عملدرآمد کیا جا رہا ہے ؒکلین لاہور ویژن پر عملدرآمد، سالڈ ویسٹ مینجمنٹ، تجاوزات کے خاتمے اور محرم الحرام کی تیاریوں کیلئے واضح ہدایات جاری

ہفتہ 14 جون 2025 21:45

?لاہور (اُردو پوائنٹ اخبارتازہ ترین - آن لائن۔ 14 جون2025ء) وزیر اعلیٰ پنجاب کے ’’کلین لاہور‘‘ ویژن کو عملی جامہ پہنانے اور شہریوں کو بہترین سہولیات کی فراہمی یقینی بنانے کیلئے ڈپٹی کمشنر لاہور سید موسیٰ رضا کی قیادت میں ضلعی انتظامیہ نے شہر بھر میں اپنی سرگرمیاں تیز کر دی ہیں۔ اس سلسلے میں ڈپٹی کمشنر سید موسیٰ رضا نے چیف آفیسر میٹروپولیٹن کارپوریشن لاہور شاہد عباس کاٹھیہ اور اسسٹنٹ کمشنر رائیونڈ ذوہیب ممتاز کے ہمراہ تحصیل رائیونڈ کا تفصیلی دورہ کیا۔

انہوں نے رکھ شیر دا کوٹ، کوٹ آرائیاں اور گرد و نواح میں صفائی، سیوریج اور دیگر انتظامی امور کا خود جائزہ لیا۔ اسسٹنٹ کمشنر رائیونڈ نے ڈپٹی کمشنر کو محرم الحرام کی تیاریوں، صفائی مہم اور تجاوزات کے خلاف جاری آپریشنز پر بریفنگ دی۔

(جاری ہے)

ڈپٹی کمشنر نے صفائی کے ناقص انتظامات کی نشاندہی کی اور متعلقہ اداروں کو کارکردگی فوری بہتر بنانے کی ہدایت کی۔

انہوں نے واضح ہدایات جاری کیں کہ وزیر اعلیٰ پنجاب کے وڑن کے تحت گھر گھر سے کوڑا اٹھانے کے نظام کو پورے ضلع میں فعال کیا جائے اور سالڈ ویسٹ کو روزانہ کی بنیاد پر مخصوص ڈمپنگ سائٹس پر منتقل کیا جائے۔ انہوں نے ایل ڈبلیو ایم سی اور اسسٹنٹ کمشنر کو صفائی سے متعلق عوامی آگاہی مہم چلانے کا بھی حکم دیا۔ ڈپٹی کمشنر نے کہا کہ کوڑے کو آگ لگانے پر سخت کارروائی ہو گی اور رہائشی علاقوں سے جھگیوں اور مویشیوں کا فوری انخلا یقینی بنایا جائے۔ انہوں نے محرم الحرام سے قبل تمام جلوس روٹس پر بہترین انتظامات مکمل کرنے اور تجاوزات کا مکمل خاتمہ یقینی بنانے کی بھی ہدایت کی۔