ں*پیدائشی طور پر سنگین امراض کا شکار باہمت، ہونہار نوجوان کی سنٹرل پولیس آفس آمد

لله*نور الدین کی اپنے والد ظہیر بابر اور بھائی شان الہی کے ہمراہ آئی جی پنجاب ڈاکٹر عثمان انور سے ملاقات

اتوار 15 جون 2025 22:30

[ لاہور (اُردو پوائنٹ اخبارتازہ ترین - آن لائن۔ 15 جون2025ء) انسپکٹر جنرل پولیس پنجاب ڈاکٹر عثمان انور سے پیدائشی طور پر سنگین امراض کا شکار باہمت اور ہونہار نوجوان نے سنٹرل پولیس آفس میں ملاقات کی۔ ترجمان پنجاب پولیس نے بتایا کہ نور الدین نے اپنے والد ظہیر بابر اور بھائی شان الہی کے ہمراہ آئی جی پنجاب ڈاکٹر عثمان انور سے ملاقات کی۔ پیدائشی طور پر سنگین امراض (انچوڑ پلیجا، تھوریکو لمبر اسکولیوسس، دمہ) میں مبتلا 19 سالہ نور الدین کی جسمانی نشوونما ممکن نہیں۔

نور الدین نے پنجاب پولیس کی شاندار کمیونٹی سروسز سے متاثر ہو کر آئی جی پنجاب سے ملاقات کی خواہش ظاہر کی تھی۔ نور الدین نے آئی جی پنجاب کو اردو اور انگریزی زبانوں میں اپنی تصانیف پیش کیں۔آئی جی پنجاب نے انتہائی غیر معمولی امراض اور جسمانی معذوری کے باوجود بہترین تخلیقی صلاحیتوں کا مظاہرہ کرنے پر نور الدین کی صلاحیتوں کو سراہا۔

(جاری ہے)

آئی جی پنجاب نے کہا کہ باہمت نوجوان نے مستحکم عزم، سخت محنت اور لگن سے جسمانی معذوری کو اپنی خداداد صلاحیتوں کے آڑے نہیں آنے دیا۔آئی جی پنجاب نے نور الدین کو پولیس تحفظ مراکز کے ذریعے اپنے جیسے باصلاحیت نوجوانوں کی کمیونٹی تشکیل دینے اور گرومنگ کی ہدایت کی۔ اس موقع پر ڈاکٹر عثمان انور نے کہا کہ پنجاب پولیس تحفظ مراکز کے ذریعے نور الدین جیسے باہمت نوجوانوں کی بھرپور سپورٹ اور حوصلہ افزائی لئے تیار ہے۔ ترجمان پنجاب پولیس نے بتایا کہ نورالدین نے سنگین امراض، جسمانی معذوری کے باوجود دو تصانیف "سوال" اور "مسافر" تحریر کیں۔