تھانہ سٹی کی حدود جنرل بس اسٹینڈ سے ایک شخص کی نعش برآمد

سٹی پولیس کی کارروائیاں ،پتنگ فروش گرفتار ، پچاس بوتل شراب برآمد کر کے ملزم کو حراست میں لے لیا

پیر 16 جون 2025 23:03

چکوال(اُردو پوائنٹ اخبارتازہ ترین - این این آئی۔ 16 جون2025ء)تھانہ سٹی کی حدود جنرل بس اسٹینڈ سے ایک شخص کی نعش برآمدہوئی ہے جس کو خدشہ ظاہر کیاگیا ہے کہ یہ خود کشی ہے یا منشیات کی عدم دستیابی سے اسکی موت واقعہ ہوئی ہے۔ سٹی پولیس چکوال نے موقع پر پہنچ کر نعش کو قبضہ میں لے لیا ،جس کی شناخت بلال ولد خالد محمود سکنہ جھاٹلہ جسوال بعمر 32/33 سال سے ہوئی ہے۔

مذکورہ شخص منشیات کا عادی بتایا جاتا ہے۔جنرل بس سٹیند علاقہ تھانہ سٹی چکوال میں ایک شخص کی نعش ملنے کے واقعہ پر ڈسٹرکٹ پولیس آفیسر چکوال لیفٹیننٹ ریٹائرڈ احمد محی الدین نے فوری نوٹس لیا ۔ ایس ایچ او تھانہ سٹی چکوال سب انسپکٹر ضمیر حسین ہمراہ نفری موقع پر پہنچے علاقہ کو گھیرے میں لے کر سرچ آپریشن کیا گیا۔

(جاری ہے)

کرائم سین یونٹ اورPFSAکی ٹیموں کو بھی موقع پر بلوا لیا گیا ہے جو جائے وقوعہ سے شواہد اکھٹے کرلیئے گئے۔

پولیس مزید تفتیش کررہی ہے۔ادھر سٹی پولیس نے پتنگ فروش کو گرفتار کرلیا۔ ڈسٹرکٹ پولیس آفیسر چکوال لیفٹیننٹ ریٹائرڈ احمد محی الدین کی زیر نگرانی جرائم پیشہ عناصر کیخلاف کارروائیاں جاری ہیں۔ سب انسپکٹر خالد شہزاد نے ہمراہ ٹیم کاروائی کرتے ہوئے پتنگ فروشی میں ملوث ملزم حامد خان ولد زاہد خان کے قبضہ سے پتنگیں اور کیمیکل ڈوریں برآمد کرکے مقدمہ درج کر کے ملزم گرفتارکرلیا۔

دریں اثناء سٹی پولیس نے 50بوتل شراب برآمد کر کے ملزم کو گرفتار کرلیا۔ ڈسٹرکٹ پولیس آفیسر چکوال لیفٹیننٹ ریٹائرڈ احمد محی الدین کی زیر نگرانی منشیات فروشوں کیخلاف کارروائیاں جاری ہیں ،اسسٹنٹ سب انسپکٹر عدنان عباس اور ان کی ٹیم نے منشیات فروش کامران جاوید ولد جاوید مسیح کو گرفتار کرکے اسکے قبضہ سے 50 بوتل شراب برآمد کر کے مقدمہ درج کرلیا۔