ڈپٹی کمشنر کیپٹن (ر) ندیم ناصر کی زیر صدارت ڈینگی سے بچاؤ کے حوالے سے اہم اجلاس کا انعقاد

فیصل آباد (اُردو پوائنٹ اخبارتازہ ترین - اے پی پی۔ 17 جون2025ء) ڈپٹی کمشنر کیپٹن (ر) ندیم ناصر کی زیر صدارت ڈینگی سے بچاؤ کے حوالے سے ایک اہم اجلاس منعقد ہوا ،جس میں تمام متعلقہ محکموں کے افسران نے شرکت کی۔ اجلاس کے دوران ضلع میں ڈینگی کی موجودہ صورتحال، ممکنہ خطرات اور انسدادی اقدامات کا تفصیلی جائزہ لیا گیا۔ ڈپٹی کمشنر نے اجلاس سے خطاب کرتے ہوئے کہا کہ آنے والے دن انتہائی اہم ہیں، محکمے اپنی ذمہ داریاں پوری دلجمعی اور ہم آہنگی سے ادا کریں۔

انہوں نے واضح ہدایات جاری کرتے ہوئے کہا کہ ڈینگی ہاٹ سپاٹس کو100 فیصد کور کیا جائے اور ان میں کسی قسم کی کوتاہی برداشت نہیں کی جائے گی۔ڈپٹی کمشنر نے کہا کہ ہائی رسک یونین کونسلز پر خصوصی فوکس رکھا جائے اور وہاں مؤثر مانیٹرنگ، سرویلنس اور فوگنگ کا عمل یقینی بنایا جائے۔

(جاری ہے)

انہوں نے انٹامالوجسٹ کو ہدایت کی کہ وہ زیادہ سے زیادہ فیلڈ میں موجود رہیں اور عوامی آگاہی و اِن ڈور ،آؤٹ ڈور سرویلنس کو ترجیح دیں،فیلڈ میں پی ایچ اے، واسا اور ویسٹ مینجمنٹ کمپنی مل کر کام کریں اورکسی جگہ پانی کھڑا نہ ہونے دیں، نکاسی آب کے نظام کو فعال رکھیں اور صفائی کے عمل کو مربوط انداز میں جاری رکھیں۔

ڈپٹی کمشنر نے سختی سے تاکید کی کہ کسی بھی جگہ پانی کھڑا نہیں ہونا چاہیے کیونکہ یہی ڈینگی لاروا کی افزائش کا بنیادی ذریعہ ہے۔انہوں نے شہریوں سے بھی اپیل کی کہ وہ اپنے گھروں، دفاتر اور اردگرد کے ماحول کو صاف رکھیں، کہیں پانی جمع نہ ہونے دیں اور ضلعی انتظامیہ سے بھرپور تعاون کریں۔دریں اثنا ڈپٹی کمشنر کیپٹن (ر) ندیم ناصر نے کہا ہے کہ بچوں کو مہلک بیماریوں سے بچانے کے لئے حفاظتی ٹیکوں کا بروقت اور مکمل کورس نہایت ضروری ہے۔

انہوں نے والدین پر زور دیا کہ وہ 16 جون تا15 جولائی تک جاری رہنے والی ویکسینیشن مہم میں اپنے پانچ سال تک کی عمر کے بچوں کو حفاظتی ٹیکوں کا مکمل کورس ضرور کروائیں۔ڈپٹی کمشنر کیپٹن (ر) ندیم ناصر نے بچوں کو حفاظتی ویکسین کے قطرے پلا کر مہم کا باقاعدہ افتتاح کیا۔اس موقع پر محکمہ صحت کے افسران،فیلڈ سٹاف اور والدین کی بڑی تعداد بھی موجود تھی۔

انہوں نے کہا کہ حکومت پنجاب بچوں کی صحت کو اولین ترجیح دے رہی ہے اور اس مہم کا مقصد ہر بچے کو حفاظتی ٹیکہ جات کی بروقت فراہمی کو یقینی بنانا ہے تاکہ آئندہ نسل مہلک اور قابلِ بچاؤ بیماریوں سے محفوظ رہ سکے۔ ڈپٹی کمشنر نے شدید گرمی کے باوجود فیلڈ میں متحرک ویکسینیشن ٹیموں کی کارکردگی کو سراہا اور انہیں ہدایت کی کہ کوئی بچہ حفاظتی ٹیکہ جات سے محروم نہ رہے۔انہوں نے کہا کہ مہم کے دوران سو فیصد کوریج کو ہر صورت یقینی بنایا جائے۔