ریکو ڈِک مائننگ کمپنی کی فیز 1 کے لیے پروجیکٹ فنانس کے تحت 3 ارب ڈالر کی رقم کے حصول کے لئے پیش رفت جاری

منگل 17 جون 2025 23:10

کوئٹہ (اُردو پوائنٹ اخبارتازہ ترین - اے پی پی۔ 17 جون2025ء) ریکو ڈِک مائننگ کمپنی (آر ڈی ایم سی) فیز 1 کے لیے پروجیکٹ فنانس کے تحت 3 ارب ڈالر کی رقم کے حصول کے لئے اپنی پیش رفت جاری رکھے ہوئے ہے۔ اس مالی معاونت میں کئی بین الاقوامی قرض دہندگان شامل ہیں جن میں انٹرنیشنل فنانس کارپوریشن (آئی ایف سی)، انٹرنیشنل ڈیولپمنٹ ایسوسی ایشن (آئی ڈی اے)، ایشیائی ترقیاتی بینک (اے ڈی بی)، امریکی بین الاقوامی ترقیاتی فنانس کارپوریشن (ڈی ایف سی)، امریکہ کا ایکسپورٹ۔

امپورٹ بینک (ایگزم یو ایس)، ایکسپورٹ ڈیولپمنٹ کینیڈا (ای ڈی سی)، جرمنی کے یولرہرمس اے جی اور کے ایف ڈبلیو آئی پیکس بینک جی ایم ایچ ،سویڈن کے ایکسپورٹ کریڈٹ نیمندن (ای کے این) اور فن لینڈ کا فنویرا اوئےشامل ہیں، علاوہ ازیں ایک کمرشل بینک کی قسط بھی شامل ہے۔

(جاری ہے)

آر ڈی ایم سی پروجیکٹ فنانس دستاویزات پر دستخط کرنے کی راہ پر گامزن ہے اور 2025 کی دوسری ششماہی میں ابتدائی ڈرا ڈاؤن کے لیے منصوبہ جاتی قرض دستیاب ہے۔

ریکوڈک کی طرف سے جاری پریس ریلیز کے مطابق اس سلسلے میں،آر ڈی ایم سی 12 جون 2025 کو آئی ایف سی اور آئی ڈی اے کی جانب سے ایک مشترکہ بورڈ اجلاس میں کمپنی کے لیے 700 ملین امریکی ڈالر تک کے براہِ راست قرض کی منظوری کا خیر مقدم کرتا ہے۔2028 کے آخر تک منصوبے سے پہلی پیداوار کا ہدف بدستور برقرار ہے۔