ایس ای سی پی کے زیراہتمام ڈیفائنڈ کنٹری بیوشن پنشن سکیموں کی منتقلی پر اعلیٰ سطحی قومی ورکشاپ کا انعقاد

منگل 17 جون 2025 22:26

اسلام آباد (اُردو پوائنٹ اخبارتازہ ترین - اے پی پی۔ 17 جون2025ء) سکیورٹیز اینڈ ایکسچینج کمیشن آف پاکستان (ایس ای سی پی) نے اسلام آباد میں ڈیفائنڈ کنٹری بیوشن (ڈی سی) پنشن سکیموں کی منتقلی پر ایک اعلیٰ سطحی قومی ورکشاپ کی میزبانی کی جس میں عوامی اور مالیاتی شعبوں کے کلیدی سٹیک ہولڈرز کو اکٹھا کیا گیا۔تقریب کی صدارت وزیر خزانہ سینیٹر محمد اورنگزیب نے کی جنہوں نے موجودہ متعین فوائد کے نظام کے عدم استحکام کو نوٹ کرتے ہوئے پنشن میں اصلاحات کی فوری ضرورت پر زور دیا۔

انہوں نے اس منتقلی کے عمل کی حمایت اور اس کے کامیاب عملدرآمد کو یقینی بنانے کے لیے حکومت کے عزم کا اعادہ کیا۔اپنے خطاب میں چیئرمین ایس ای سی پی عاکف سعید نے ڈی سی پنشن سکیمز کے لیے ایک مضبوط ریگولیٹری فریم ورک کی تیاری میں ہونے والی پیش رفت کا خاکہ پیش کیا۔

(جاری ہے)

انہوں نے ایک جدید اور جامع پنشن نظام کی تشکیل میں ٹیکنالوجی، شفافیت اور آگاہی پیدا کرنے کے اہم کردار پر زور دیا۔

وفاقی اور صوبائی حکومتوں کے نمائندوں نے پنشن اصلاحات میں ہونے والی پیش رفت سے آگاہ کیا جبکہ خیبر پختونخوا نے اس نظام کے ابتدائی تجربے سے حاصل ہونے والی اہم باتیں شیئر کیں۔ یہ ورکشاپ اعلیٰ حکام، ریگولیٹرز، مالیاتی ماہرین اور ترقیاتی اداروں کے درمیان بات چیت کے لیے ایک اہم موقع ثابت ہوئی۔ایس ای سی پی نے وعدہ کیا کہ وہ تمام متعلقہ فریقوں کے ساتھ مل کر ایک ایسا پنشن نظام بنائے گا جو شفاف، قابل اعتماد ہو اور مستقبل کی ضروریات کو پورا کرے تاکہ لوگوں کو طویل مدت کے لیے مالی تحفظ حاصل ہو۔