پیرس ، انٹرنیشنل بیورو آف ایگزبیشنز کی جنرل اسمبلی کے اجلاس میں ریاض ایکسپو 2030 کی رجسٹریشن فائل منظور

بدھ 18 جون 2025 10:10

پیرس (اُردو پوائنٹ اخبارتازہ ترین - اے پی پی۔ 18 جون2025ء) انٹرنیشنل بیورو آف ایگزبیشنز کی جنرل اسمبلی نے ریاض ایکسپو 2030 کی رجسٹریشن فائل کی حتمی منظوری دے دی، یہ یکم اکتوبر 2030 سے 31 مارچ 2031 تک جاری رہے گی۔سعودی خبررساں ادارے ( ایس پی اے ) کے مطابق انٹرنیشنل بیورو آف ایگزیبیشنز کی جنرل اسمبلی کا اجلاس فرانس کے دارالحکومت پیرس میں ہوا جس میں ریاض ایکسپو 2030 کی رجسٹریشن فائل کی حتمی منظوری دی گئی اور باضابطہ طور پر سعودی عرب کو اس عالمی ایونٹ کا میزبان قرار دیا گیا اور ایکسپو کا علامتی پرچم بھی سعودی وفد کے حوالے کیا گیا۔

سعودی وفد کی سربراہی وزیر مملکت انجینئر ابراہیم محمد السلطان کررہے تھے، فرانس میں سعودی سفیرفہد الرویلی کے علاوہ دیگر اعلیٰ عہدیدار بھی اس موقعے پر موجود تھے۔

(جاری ہے)

ایکسپو فائل کی حتمی منظوری کا مرحلہ مکمل ہونے پر سعودی وفد کے سربراہ انجینئرابراہیم السلطان کا کہنا تھا کہ ایکسپو فائل کی منظوری اس بات کی علامت ہے کہ تیاری اور اس حوالے سے تمام جزئیات کی تکمیل انتہائی مہارت سے کی گئی جوسب کے لئے باعث مسرت ہے۔

انہوں نے کہا کہ مملکت کی ایکسپو کی تیاریاں اس بات کی دلیل ہیں کہ یہ تاریخ میں ایک منفرد اور مثالی نمائش ہو گی جو مملکت کے وژن 2030 سے مطابقت رکھتی ہے۔سعودی دارالحکومت ریاض ایکسپو کی تاریخ کے حوالے سے پہلا ملک ہے جس کی رجسٹریشن فائل مقرر وقت سے بھی کم مدت میں مکمل کرکے جمع کرائی گئی۔واضح رہے ایکسپو 2030 ریاض میں یکم اکتوبر 2030 سے شروع ہوگی جو 31 مارچ 2031 تک جاری رہے گی۔نمائش کے لئے 60 لاکھ مربع میٹرکا رقبہ مخصوص کیا گیا ہے۔ یہ ایکسپو کی تاریخ میں سب سے بڑی نمائش ہو گی۔نمائش میں 195 ممالک سے 40 ملین سے زائد افراد کی شرکت متوقع ہے جن کے خیرمقدم اور رہائش کی تیاریاں زوروشور سے جاری ہیں۔