ڈپٹی کمشنر دُکی محمد نعیم خان کی ہدایت پر جامع اور اہم موک ایکسرسائز کا انعقاد

بدھ 18 جون 2025 22:50

کوئٹہ (اُردو پوائنٹ اخبارتازہ ترین - اے پی پی۔ 18 جون2025ء) ڈپٹی کمشنر دُکی محمد نعیم خان کی ہدایت پر ایک جامع اور اہم موک ایکسرسائز کا انعقاد کیا گیا، جس کا مقصد کسی بھی ہنگامی یا ناخوشگوار واقعے سے نمٹنے کے لیے ضلعی انتظامیہ اور قانون نافذ کرنے والے اداروں کی تیاری کو جانچنا اور بہتر بنانا تھا۔ اس ایکسرسائز میں ایف سی (فرنٹیئر کور)، لیویز فورس اور دیگر متعلقہ اداروں نے بھرپور شرکت کی۔

مشق کے دوران ایک فرضی ہنگامی صورتحال پیدا کی گئی، جس میں سیکیورٹی فورسز نے فوری طور پر کارروائی کرتے ہوئے علاقہ کو محفوظ بنایا، مشکوک افراد کی شناخت کی اور متاثرہ مقام پر امدادی کارروائیاں کیں۔ اس دوران ریڈیو کمیونیکیشن، گاڑیوں کی نقل و حرکت، رسپانس ٹیم کی تعیناتی اور عوامی تعاون جیسے اہم پہلوؤں کا عملی مظاہرہ کیا گیا۔

(جاری ہے)

اس مشق کا مقصد فورسز کی تیاری، آپس میں رابطے اور کسی بھی ممکنہ دہشتگردی یا ہنگامی صورتحال میں فوری اور مؤثر ردعمل کی صلاحیت کو جانچنا تھا۔

اسسٹنٹ کمشنر لونی مجیب الرحمٰن بلوچ نے اس موک ایکسرسائز کی نگرانی کی اور سیکیورٹی اہلکاروں کی کارکردگی کو سراہا۔ انہوں نے کہا کہ عوام کے جان و مال کا تحفظ اولین ترجیح ہے اور اس طرح کی مشقیں نہ صرف فورسز کی صلاحیتوں میں اضافہ کرتی ہیں بلکہ کسی بھی ممکنہ خطرے سے نمٹنے کے لیے تیار رکھتی ہیں۔

Facebook Twitter Google + Share on Whatsapp

ڈپٹی کمشنر دُکی محمد نعیم خان کی ہدایت پر جامع اور اہم موک ایکسرسائز کا انعقاد

متعلقہ عنوان :

مزید قومی خبریں