نامور گلوکار استاد برکت علی خان کی 63 ویں برسی منائی گئی

جمعرات 19 جون 2025 17:27

لاہور (اُردو پوائنٹ اخبارتازہ ترین - اے پی پی۔ 19 جون2025ء) برصغیر کے معروف گلوکار استاد برکت علی خان کی 63 ویں برسی 19جون بروز جمعرات کو منائی گئی ،انہیں دنیا سے رخصت ہوئے تریسٹھ برس بیت گئے ۔گلوکار استاد برکت علی خان 1905 کو قصورمیں پیدا ہوئے، وہ استاد علی بخش خان قصوری کے فرزند اور استاد بڑے غلام علی خان کے چھوٹے بھائی تھے، ان کا تعلق موسیقی کے مشہور پٹیالہ گھرانے سے تھا۔

(جاری ہے)

انہوں نے موسیقی کی تعلیم اپنے والد علی بخش خان قصوری سے حاصل کی وہ ٹھمری، دادرا، غزل، گیت اور ماہیا گانے میں اپنا جواب نہیں رکھتے تھے۔ انہوں نے غزل گائیکی کو نئی جہت بخشی،ان کا کلاسیکل فن آج بھی لوگوں کے دلوں میں زندہ ہے۔ استادبرکت علی خان کی آواز میں اتنا درد اور رسیلاپن تھا کہ سننے والے وجد میں آجاتے، 1940 کی دہائی میں انہیں جنوبی ایشیا میں غزل گائیکی کا بے تاج بادشاہ تصور کیا جاتا تھا۔انہوں نے کلاسیکل گلوکاری میں ناصرف شہرت حاصل کی بلکہ گلوکاری کے میدان میں بھی اپنی صلاحیتوں کے جوہر دکھائے۔استاد برکت علی خان 19 جون 1962 کو اپنے خالق حقیقی سے جا ملے ۔