ایلون مسک کی کمپنی سپس ایکس کا سٹارشپ راکٹ معمول کے ٹیسٹ کے دوران دھماکے سے پھٹ گیا

جمعرات 19 جون 2025 17:30

واشنگٹن (اُردو پوائنٹ اخبارتازہ ترین - اے پی پی۔ 19 جون2025ء) امریکی ارب پتی ایلون مسک کی کمپنی سپیس ایکس کا سٹارشپ راکٹ بدھ کو دیر گئے ٹیکساس میں معمول کے ٹیسٹ کے دوران دھماکے سے پھٹ گیا۔ اے ایف پی کے مطابق کیمرون کاؤنٹی کے حکام کی جانب سے ایک فیس بک پوسٹ میں کہا گیا ہے کہ سٹار شپ 36 مقامی وقت کے مطابق رات 11 بجے کے فوراً بعد سٹار بیس میں پھٹ گیا جومیکسیکو کی سرحد کے قریب ٹیکساس کے جنوبی ساحل پر ایلون مسک کے خلائی منصوبے کا ہیڈ کوارٹر ہے۔

(جاری ہے)

سپیش ایکس کی طرف سے اس حوالہ سے جاری بیان میں کہا گیا ہے کہ راکٹ دسویں فلائٹ ٹیسٹ کی تیاری کر رہا تھا جب سٹاربیس پر ٹیسٹ سٹینڈ پر حادثہ رونما ہوا۔بیان میں مزید کہا گیا ہے کہ اس واقعہ میں کوئی شخص ہلاک یا زخمی نہیں ہوا۔سائٹ کے ارد گرد ایک سیفٹی کلیئر ایریا محفوظ ہے اورآس پاس کی کمیونٹیز کے رہائشیوں کو کوئی خطرہ نہیں ہے ۔ بیان میں لوگوں سے درخواست کی گئی ہے کہ حفاظتی کارروائیاں جاری رہنے کے دوران وہ اس علاقے تک پہنچنے کی کوشش نہ کریں۔ 123 میٹر طویل سٹار شپ دنیا کا سب سے بڑا اور طاقتور راکٹ ہے اور مریخ کو نوآبادیاتی بنانے کے مسک کے طویل مدتی وژن کا مرکز ہے۔اس سے قبل مئی کے آخر میں بحر ہند کے اوپر ایک پروٹو ٹائپ سٹار شپ دھماکے سے پھٹ گیا تھا۔