گزشتہ سال شدید ڈپریشن کا شکار رہی، بیماری بہت کچھ سکھاتی ہے، نوشین شاہ

جمعرات 19 جون 2025 22:17

لاہور(اُردو پوائنٹ اخبارتازہ ترین - آن لائن۔ 19 جون2025ء) اداکارہ نوشین شاہ نے اعتراف کیا ہے کہ وہ گزشتہ چند سال سے ڈپریشن اور انزائٹی کا شکار ہیں جب کہ گزشتہ برس ان کا ڈپریشن انتہا کو پہنچ گیا تھا اور وہ 70 دن تک انتہائی علیل رہیں۔نوشین شاہ نے حال ہی میں نجی ٹی وی شو میں شرکت کی، جہاں انہوں نے دیگر معاملات سمیت ذہنی صحت پر بھی بات کی۔ایک سوال کے جواب میں نوشین شاہ نے کہ لازمی نہیں کہ ہر کسی کو دل کا ٹوٹنا یا پیار میں دھوکا ملنا زندگی کے سبق سکھائے۔

انہوں نے کہا کہ ان کے خیال میں دل ٹوٹنے سے زیادہ بیماری انسان کو بہت کچھ سکھاتی ہے اور انہوں نے بھی بیماری سے بہت کچھ سیکھا۔اداکارہ نے اسی حوالے سے بات کرتے ہوئے بتایا کہ وہ گزشتہ چند سال سے ڈپریشن کا شکار ہیں اور گزشتہ سال انہیں شدید کلینیکل انزائٹی کے اٹیک ہوئے، وہ 60 سے 70 دن تک انتہائی علیل رہیں۔

(جاری ہے)

نوشین شاہ کے مطابق انزائٹی کا شکار ہونے کے باوجود وہ اینٹی ڈپریشن ادویات لینے سے انکاری تھیں لیکن گزشتہ برس ڈپریشن بڑھ جانے پر انہوں نے ڈاکٹروں کے ڈانٹنے پر ادویات لینا شروع کیں۔

انہوں نے بتایا کہ انہوں نے تھراپی، ورزش اور دوسری چیزوں کا بھی سہارا لیا جب کہ ڈپریشن میں والدہ نے ان کا سب سے زیادہ ساتھ دیا۔اداکارہ کا کہنا تھا کہ ڈپریشن اور انزائٹی جیسے مسائل کو ہمارے سماج میں نظر انداز کیا جاتا ہے، اس کا علاج نہیں کروایا جاتا لیکن ایسا نہیں ہونا چاہیے۔نوشین شاہ نے کہا کہ انسانی دماغ میں بھی 75 ہزار مسائل اور وائرسز ہوتے ہیں، اسے بھی علاج کی ضرورت ہے، ڈپریشن یا انزائٹی ہونے پر ڈاکٹرز سے رجوع کیا جانا چاہیے۔

اگرچہ اداکارہ نے بتایا کہ وہ گزشتہ چند سال سے ڈپریشن کا شکار ہیں اور گزشتہ برس ان کا ڈپریشن بڑھ گیا تھا لیکن انہوں نے واضح نہیں کیا کہ کس خاص المیے کی وجہ سے وہ ڈپریشن کا شکار ہوئیں جون 2024 میں نوشین شاہ نے انسٹاگرام پر حجاب میں تصاویر اور ویڈیوز شیئر کرتے ہوئے مداحوں سے دعاوں کی اپیل کی تھی اور بتایا تھا کہ وہ شدید ڈپریشن کا شکار ہیں۔اس سے قبل مئی 2024 میں ہی انہوں نے سوشل میڈیا پوسٹ کے ذریعے بتایا تھا کہ ان کی کامیابی سے سرجری ہوگئی لیکن انہوں نے سرجری یا بیماری سے متعلق کوئی وضاحت نہیں کی تھی۔