رسو ل اکرمﷺ کے ہر صحابی کا مقام افضل اور عظیم ہے‘ سنی علما کونسل

اہل بیت اور نبی کریم کے اصحاب کا گستاخ دنیا اور آخرت دونوں میں ذلیل ہے‘حافظ حسین احمد

جمعہ 20 جون 2025 12:33

لاہور (اُردو پوائنٹ اخبارتازہ ترین - این این آئی۔ 20 جون2025ء)صدر سنی علما کونسل لاہور وصوبائی ترجمان مولانا حافظ حسین احمدنے کہاہے کہ رسو ل اکرمﷺ کے ہر صحابی کا مقام افضل اور عظیم ہے۔ مسلمان کسی صورت میں صحابہ کرام اور اہل بیت کی توہین کو برداشت نہیں کر سکتے۔ آنے والی صدی، انشا اللہ، اسلام کی صدی ہو گی۔ جو شخص نبی اکرم صلی اللہ علیہ وسلم کے اہل بیت یا صحابہ کرام کی گستاخی کرے گا، وہ دنیا و آخرت میں ذلیل و رسوا ہوگا۔

اپنے جاری بیان میں انہوں نے کہا کہ محرم الحرام کے مہینے میں امن و سکون کی فضا قائم رکھنے کے لیے ہم انتظامیہ کے ساتھ مکمل تعاون کریں گے مگر اگر کہیں بھی صحابہ کرام رضوان اللہ علیہم اجمعین کی توہین کی گئی تو پھر قانون اپنی جگہ حرکت میں آئے اور ہمیں قانون کو ہاتھ میں لینے پر مجبور نہ ہونا پڑے۔

(جاری ہے)

محرم الحرام کے دوران امن قائم رکھنے کے لیے ہر فرد کو اپنا کردار ادا کرنا ہوگا۔

ہمیں اپنے نبی اکرم صلی اللہ علیہ وسلم کے اہل بیتؓ اور صحابہ کرامؓ کی عظمت و حرمت سے بڑھ کر کوئی چیز عزیز نہیں۔ ہمارے اکابر و علما نے ہمیشہ صبر و تحمل کا مظاہرہ کیا اور انتظامیہ کے ساتھ تعاون کیا تاکہ ملک میں امن و سکون قائم رہے اور کسی بھی قسم کی بد امنی سے بچا جا سکے۔یہ ملک ہمارا ہے اور ہم کسی بھی حالت میں اس میں بد امنی یا فساد نہیں چاہتے۔ تاہم، ہمارے تعاون کو کمزوری بھی نہ سمجھا جائے۔ اگر محرم الحرام میں کسی بدبخت نے صحابہ کرامؓ کی توہین کی تو وہ ہم سے نرمی کی کوئی توقع نہ رکھے۔ ہماری غیرت اور عقیدہ ہمیں اس بات کی اجازت نہیں دیتے کہ ہم اس گستاخی کو برداشت کریں۔