ٹونگ وون یونیورسٹی کوریا اور نمل کے درمیان تعلیمی تعاون کو فروغ دینے کیلئے لیٹر آف انٹرسٹ پر دستخط

اسلام آباد (اُردو پوائنٹ اخبارتازہ ترین - اے پی پی۔ 20 جون2025ء) نائب صدر ٹونگ وون یونیورسٹی کوریا، پروفیسر ڈاکٹر چوئی جونگ کی زیرصدارت ایک اعلیٰ سطحی وفد نے جمعہ کو نیشنل یونیورسٹی آف ماڈرن لینگویجز کا دورہ کیا۔ دورے کا مقصد تعلیمی تعاون اور ثقافتی تبادلے کے امکانات کا جائزہ لینا تھا۔وفد کا استقبال ریکٹر نمل میجر جنرل (ر) شاہد محمود کیانی ہلال امتیاز (ملٹری) اور دیگر اعلیٰ حکام نے کیا۔

ملاقات کے دوران دونوں جامعات نے طلبہ کے تبادلے، تعلیمی معیار، تحقیق کے مواقع اور ادارہ جاتی شراکت داری سمیت باہمی تعاون کے مختلف پہلوئوں پر تبادلہ خیال کیا۔ریکٹر سے ملاقات کے بعد وفد نے کورین لینگویج ڈیپارٹمنٹ کے طلبہ اور فیکلٹی ممبران سے ملاقات کی جس کے بعد سوال و جواب کا ایک سیشن بھی منعقد ہوا۔

(جاری ہے)

اپنے خطاب میں نائب صدر ڈاکٹر چوئی نے نمل کے تعلیمی ماحول کی تعریف کی اور میزبانی پر شکریہ ادا کیا۔

انہوں نے طلبہ کو محنت کرنے اور اپنے خوابوں کو حقیقت میں بدلنے کی تلقین کی۔ٹونگ وون یونیورسٹی کے انٹرنیشنل ڈیپارٹمنٹ کے ڈائریکٹر نے جامع پریزنٹیشن دی جس میں یونیورسٹی کی تعلیمی خصوصیات، جدید سہولیات اور پاکستانی بالخصوص نمل کے طلبہ کے لیے موجود مواقع پر روشنی ڈالی گئی۔ انہوں نے بتایا کہ کوریا کی حکومت نے حال ہی میں ایک پائلٹ پروگرام کا آغاز کیا ہے جس کے تحت پاکستانی طلبہ دو سالہ ڈپلومہ پروگرام میں داخلہ لے سکتے ہیں اور دوران تعلیم پارٹ ٹائم ملازمت کے مواقع سے فائدہ اٹھا سکتے ہیں جس سے انہیں تعلیمی اور مالی دونوں طرح کی سہولیات حاصل ہوں گی۔

تقریب کا اختتام پرو ریکٹر (ریسرچ اینڈ سٹریٹجک انیشی ایٹو) ڈاکٹر سفیر اعوان کے اختتامی کلمات سے ہوا جنہوں نے کورین وفد کا نمل میں دلچسپی لینے اور بین الاقوامی تعلیمی تعاون کو فروغ دینے پر شکریہ ادا کیا۔بعد ازاں نمل اور ٹونگ وون یونیورسٹی کوریا کے مابین لیٹر آف انٹرسٹ (ایل او آئی) پر باقاعدہ دستخط کیے گئے۔ یہ معاہدہ دونوں جامعات کے درمیان دو طرفہ تعاون کے لیے ایک جامع فریم ورک مہیا کرتا ہے جس میں طلبہ، اساتذہ، محققین اور انتظامی عملے کے تبادلے، مشترکہ تعلیمی و تحقیقی اقدامات، سیمینارز، کانفرنسز اور دیگر علمی تقریبات کا انعقاد، گریجویٹ اور پوسٹ گریجویٹ سطح پر تعاون اور استعداد کار میں اضافے کے لیے مختصر و طویل المدتی تربیتی پروگرام شامل ہیں۔

یہ شراکت داری نمل کی بین الاقوامی سطح پر تعلیمی روابط کو مضبوط بنانے اور طلبہ و اساتذہ کے لیے عالمی تعلیمی مواقع میں اضافہ کرنے کی کوششوں میں ایک اہم سنگ میل ثابت ہوگی۔