ایران کے خلاف اسرائیلی حملے امریکہ کی سفارتی کوششوں کے ساتھ "خیانت" اور سفارت کاری کے ساتھ غداری تھی، ایرانی وزیر خارجہ عباس عراقچی

جمعہ 20 جون 2025 20:20

جنیوا (اُردو پوائنٹ اخبارتازہ ترین - اے پی پی۔ 20 جون2025ء) ایران کے وزیر خارجہ عباس عراقچی نے ایران کے خلاف اسرائیلی حملوں کو امریکہ کی سفارتی کوششوں کے ساتھ "خیانت" اور سفارت کاری کے ساتھ غداری قرار دیتے ہوئے اس کی مذمت کی ہے۔ انھو ں نے جمعہ کے روز کہا کہ تہران اور واشنگٹن ایرانی جوہری پروگرام پر ایک "امید بھرا معاہدہ" کرنے والےتھے۔

جنیوا میں انھوں نے اقوام متحدہ کی انسانی حقوق کی کونسل کو یورپی وزرائے خارجہ کے ساتھ ایک اہم میٹنگ سے قبل بتایا کہ "ایک جاری سفارتی عمل کے دوران ہم پر حملہ کیا گیا"۔ حملوں کے بعد اپنے پہلے غیر ملکی دورہ کے دوران انھوں نے اسرائیل کے حملے کو "جارحیت کا ایک اشتعال انگیز اقدام" قرار دیا۔

(جاری ہے)

امریکہ کے خصوصی ایلچی سٹیو وٹ کوف نے 15 جون کو عمان میں عباس عراقچی سے ملاقات کا منصوبہ بنایا تھا لیکن اسرائیل کی جانب سے کچھ دن پہلے حملے شروع کرنے کے بعد یہ ملاقات منسوخ کر دی گئی۔

انھوں نے کہا کہ "ہمیں 15 جون کو امریکیوں کے ساتھ ملاقات کرنی تھی تاکہ ہمارے پرامن جوہری پروگرام پر گھڑے گئے مسائل کے پرامن حل کے لیے ایک بہت ہی امید افزا معاہدہ کیا جا سکے۔" انہوں نے کہا کہ "یہ سفارت کاری کے ساتھ غداری اور بین الاقوامی قانون کی بنیادوں کو بڑا دھچکا تھا۔"