سعودی عرب میں فلکیاتی اعتبار سے موسم گرما کا آغاز ہفتہ سے ہو گیا

ہفتہ 21 جون 2025 10:30

جدہ (اُردو پوائنٹ اخبارتازہ ترین - اے پی پی۔ 21 جون2025ء) جدہ میں فلکیاتی انجمن کے صدر انجینئرماجد ابوزاھرہ نے کہا ہے کہ مملکت میں موسم گرماکا آغازہفتہ 21 جون سےہو گیا ۔اردو نیوز کے مطابق مکہ مکرمہ وقت کے مطابق ہفتے کی صبح 5 بجکر 42 منٹ پر سورج سرطان کے مدار میں فلکیاتی اعتبار سے عمودی صورت میں ہوگا جو موسم گرما کے آغاز کی نشانی ہے۔

(جاری ہے)

عکاظ کے مطابق فلکیاتی اعتبار سے رواں سال موسم گرما 93 دن 15 گھنٹے اور 37 سیکنڈ پر محیط ہو گا۔

سورج انتہائی شمال مشرق سے طلوع ہوا جبکہ غروب انتہائی شمال مغربی سمت میں ہوگا جبکہ سارا سال دوپہر میں چیزوں کا سایہ چھوٹا دکھائی دیا۔ماہرین موسمیات کا کہنا ہے موسم گرما یکم جون سے 31 اگست تک رہتا ہے جبکہ فلکیات میں موسم گرما اس وقت شروع ہوتا ہے جب سورج اپنی بلند ترین پوزیشن پر پہنچتا ہے جس کے ساتھ تین ماہ پر محیط موسم گرما کا آغاز ہوتا ہے جو موسم خزاں کی آمد تک جاری رہتا ہے۔