Live Updates

ایران پر امریکی حملے نے دنیا کو سنگین جنگ کے دہانے پر لا کھڑا کیا، پی ٹی آئی

ہم اپنے برادر ملک کے باوقار عوام کے ساتھ مکمل اور غیر متزلزل یکجہتی کا اظہار کرتے ہیں، ایران کے خلاف تمام جارحانہ اقدامات کو فی الفور روکا جائے؛ ترجمان تحریک انصاف کا بیان

ساجد علی اتوار 22 جون 2025 13:29

ایران پر امریکی حملے نے دنیا کو سنگین جنگ کے دہانے پر لا کھڑا کیا، پی ..

اسلام آباد ( اُردو پوائنٹ اخبارتازہ ترین۔ 22 جون 2025ء ) پاکستان تحریک انصاف کا کہنا ہے کہ ایران پر امریکی حملے نے دنیا کو سنگین جنگ کے دہانے پر لا کھڑا کیا۔ اس حوالے سے مذمتی بیان میں کہا گیا ہے کہ ایران کی ایٹمی تنصیبات پر بلا اشتعال امریکی حملہ ایران کی خودمختاری، علاقائی سالمیت، اقوام متحدہ کے منشور اور خود امریکہ کے آئین کی کھلی خلاف ورزی ہے، اگرچہ کسی صورت میں اس حملے کو جواز نہیں دیا جا سکتا مگر کانگریس سے منظوری لینا بھی ضروری نہیں سمجھا گیا۔

ترجمان پی ٹی آئی نے مزید کہا کہ یہ حملہ ایسے وقت میں کیا گیا جب ایران پہلے ہی اسرائیلی جارحیت کا سامنا کر رہا تھا اور اس کا مقصد ایران کو جھکانا اور دباؤ میں لانا تھا، اس اقدام سے خطے میں پہلے سے موجود کشیدگی میں مزید شدت آ جائے گی، یہ حملہ عالمی معاہدوں، اصولوں، قوانین کی پابندی، پرامن بقائے باہمی کے تصور اور انسانی تقاضوں کو سراسر نظر انداز کرنے کا مظہر ہے، اس قدم نے سب کو سنگین جنگ کے دہانے پر لا کھڑا کیا ہے۔

(جاری ہے)

بیان میں کہا گیا ہے کہ پاکستان تحریکِ انصاف (پی ٹی آئی) اس بلاجواز حملے کی سخت ترین الفاظ میں مذمت کرتی ہے، پی ٹی آئی مطالبہ کرتی ہے کہ ایران کے خلاف تمام جارحانہ اقدامات کو فی الفور روکا جائے اور مسائل کے حل کے لیے پُرامن مکالمے کا آغاز کیا جائے، پی ٹی آئی ایران کی خودمختاری، علاقائی سالمیت اور پرامن مقاصد کے لیے اپنے وسائل کے استعمال کے حق کی مکمل حمایت کا اعادہ کرتی ہے، ہم اپنے برادر ملک کے باوقار عوام کے ساتھ مکمل اور غیر متزلزل یکجہتی کا اظہار کرتے ہیں جو اپنے حقِ آزادی کے دفاع کے لیے جدوجہد کر رہے ہیں۔