کانگو وائرس کے حوالے سے گھبرانے کی ضرورت نہیں ،احتیاط بہت ضروری ہے،ڈاکٹر ضیاءاللہ گوندل

اتوار 22 جون 2025 16:10

جہلم (اُردو پوائنٹ اخبارتازہ ترین - اے پی پی۔ 22 جون2025ء) موسم گرما کی شدت کے پیشِ نظر، پنجاب بھر کی طرح ضلع جہلم میں بھی ، محکمہ لائیو سٹاک نے جانوروں کی مناسب دیکھ بھال اور چیچڑیوں سے پھیلنے والے کانگو وائرس اور دیگر بیماریوں کے حوالے سے آگاہی مہم اور چیچڑوں کے خاتمے کی مہم شروع کر دی۔ سیکرٹری لائیوسٹاک اور ڈائریکٹر جنرل لائیوسٹاک پنجاب کی ہدایات کی روشنی میں، ڈائریکٹر لائیو سٹاک راولپنڈی ڈویژن ڈاکٹر نوید سحر زیدی کی رہنمائی میں ضلع جہلم کے تمام بین الاضلاعی داخلی راستوں پر چیک پوسٹیں قائم کر دی گئی ہیں۔

اس کے علاوہ منگلا پل کے مقام پر جانوروں کی بین الصوبائی نقل وحمل کی نگرانی کے لئیے بھی چیک پوسٹ کام کر رہی ہے۔ ان چیک پوسٹوں پر محکمہ لائیو سٹاک کا عملہ 24 گھنٹے ڈیوٹی سر انجام دے رہا ہے اور ضلع کے اندر آنے والےتمام جانوروں پر چیچڑیوں کے خاتمے کے لئیے سپرے کیا جا رہا ہے۔

(جاری ہے)

اس حوالے سے بات کرتے ہوئے ایڈیشنل ڈائریکٹر لائیوسٹاک جہلم ڈاکٹر ضیاءاللہ گوندل نے بتایا کہ ضلعی انتظامیہ کے تعاون سے ضلع بھر میں جانوروں پر پائی جانے والی چیچڑیوں کے خاتمے اور ان حشرات سے انسانوں میں پھیلنے والی بیماریوں سے بچاؤ کے لیئے بھر پور آگاہی مہم جاری ہے۔

اس مقصد کے لیئے محکمہ لائیوسٹاک کا عملہ کسان لائیوسٹاک بیٹھک کا انعقاد کر رہا ہے ۔ ویٹرنری ہسپتالوں، ذبح خانوں اور چیک پوسٹوں پر آگاہی بینرز آویزاں کیے گئے ہیں اور محکمہ کی موبائل ویٹرنری ڈسپنسریوں کا عملہ دیہات کی سطح پر آگاہی مہم کو جاری رکھے ہوئے ہے۔ ڈاکٹر ضیاءاللہ گوندل نے مزید کہا کہ کانگو وائرس کے حوالے سے گھبرانے کی ضرورت نہیں تاہم احتیاط بہت ضروری ہے۔\378