ایڈیشنل ڈپٹی کمشنرون شہید بینظیرآباد کی زیر صدارت جبری مشقت کی روک تھام کے لیے قائم ڈسٹرکٹ ویجیلنس کمیٹی کا اجلاس

پیر 23 جون 2025 12:01

حیدرآباد (اُردو پوائنٹ اخبارتازہ ترین - اے پی پی۔ 23 جون2025ء) ایڈیشنل ڈپٹی کمشنر ون شہید بینظیرآباد حسان ظفر کی زیر صدارت جبری مشقت کی روک تھام کے لیے قائم ڈسٹرکٹ ویجیلنس کمیٹی کا اجلاس ڈی سی آفیس کے دربار ہال میں منعقد ہوا۔ اجلاس میں ریجنل انچارج نادرا رفیق احمد بلر، ڈی ایس پی سٹی شہزاد، اسسٹنٹ ڈائریکٹر سوشل ویلفیئر آصف خٹک، ایڈیشنل ڈائریکٹر لیبر احمد دین،ایڈووکیٹ علی رضا چنہ، ہاری ویلفیئر کے اکرم خاصخیلی، عبدالقادر کیریو و دیگر کمیٹی ممبران نے شرکت کی۔

اجلاس سے خطاب کرتے ہوئے ایڈیشنل ڈپٹی کمشنر حسان ظفر نے کہا کہ ضلع میں جبری مشقت کی روک تھام کے لیے بنائے گئے قوانین پر ہر صورت میں عملدرآمد کو یقینی بنایا جائے ۔انہوں نے تمام کمیٹی ممبران پر زور دیا کہ وہ ضلع کے تمام اینٹوں کے بھٹوں کا دورہ کریں اور چائلڈ لیبر و جبری مشقت کی روک تھام کے حوالے سے آگاہی فراہم کریں۔

(جاری ہے)

ایڈیشنل ڈپٹی کمشنر نے محکمہ لیبر کے افسر کو ہدایات دیتے ہوئے کہا کہ وہ چائلڈ پروٹیکشن یونٹ کے اسسٹنٹ ڈائریکٹر اور ہاری ویلفیئر ایسوسی ایشن کے صدر کے ہمراہ قاضی احمد اور دوڑ کے اینٹوں کے بھٹوں کا دورہ کریں اور رجسٹرڈ اور غیر رجسٹرڈ اینٹوں کے بھٹوں اور بچوں سے جبری مشقت کرنے والوں کی فہرست 15 روز کے اندر ڈی سی آفیس میں ارسال کریں تاکہ غیر قانونی اینٹوں کے بھٹوں اور جبری مشقت کرانے والوں کے خلاف کاروائی کی جاسکے۔

ایڈیشنل ڈپٹی کمشنر نے کمیٹی ممبران پر زور دیا کہ جبری مشقت کی روک تھام کے لیے بنائے گئے قوانین پر عملدرآمد کو یقینی بنائیں اور درپیش مسائل کے متعلق منعقدہ اجلاس میں آگاہی فراہم کریں ۔ ایڈیشنل ڈپٹی کمشنر نے لیبر افسر کو ہدایات دیتے ہوئے مزید کہا کہ متاثرین کی مدد، تجاویز، طبی اور قانونی مدد کی فراہمی کو یقینی بنانے کے لیے اقدامات کریں اجلاس میں متعلقہ افسران نے چائلڈ لیبر اور جبری مشقت کی روک تھام کے لیے کئے گئے اقدامات کے متعلق اجلاس کو آگاہی دی۔