رواں ماہ پنجاب بھر میں 4لاکھ 76ہزار سے زائد شہریوں نے لائسنسنگ سہولیات سے استفادہ کیا

بھاری جرمانوں ،قانونی کاروائیوں سے بچنے کے لیے شہری فوری اپنا ڈرائیونگ لائسنس بنوائیں‘مرزا فاران بیگ

پیر 23 جون 2025 17:15

لاہور (اُردو پوائنٹ اخبارتازہ ترین - این این آئی۔ 23 جون2025ء) ایڈیشنل آئی جی ٹریفک پنجاب کے احکامات پر صوبہ بھر میں ڈرائیونگ لائسنس کے اجراء کا سلسلہ جاری ہے ، رواں ماہ صوبے بھر میں 4لاکھ 76ہزار سے زائد شہریوں نے لائسنسنگ سہولیات سے استفادہ کیا۔ترجمان ٹریفک پولیس کے مطابق گزشتہ تین ہفتوں میں 1لاکھ 58ہزار سے زائد شہریوں نے لرننگ لائسنس بنوائے۔

گزشتہ 3ہفتوں میں1لاکھ 69ہزار سے زائد شہریوں نے ریگولر ڈرائیونگ لائسنس بنوائے۔رواں ماہ1لاکھ 44ہزار سے زائد شہریوں نے لرننگ ریگولر ڈرائیونگ لائسنس کی تجدید کروائی، گزشتہ 3ہفتوں میں 3ہزار سے ذائد شہریوں کو انٹر نیشنل ڈرائیونگ پرمٹ جاری کیے گئے، رواں ماہ 67ہزار سے زائد شہریوں نے گھر بیٹھے جدید ان لائن لائسنسنگ پورٹل سے استفادہ کیا۔

(جاری ہے)

گزشتہ 3ہفتوں میں11ہزار سے زائد خواتین نے لائسنسنگ سہولیات سے فائدہ اٹھایا ۔ رواں ماہ 17ہزار 500سے زائد شہریوں کو کمرشل ڈرائیونگ لائسنس جاری کیے گئے۔ اس حوالے سے ایڈیشنل آئی جی ٹریفک مرزا فاران بیگ نے کہا کہ صوبہ بھر میں بغیر لائسنس ڈرائیونگ کرنے والوں کیخلاف کریک ڈائون جاری رہے گا،بغیر ڈرائیونگ لائسنس گاڑی و موٹر سائیکل چلانا جرم ہے۔ بھاری جرمانوں اور قانونی کاروائیوں سے بچنے کے لیے شہری فوری اپنا ڈرائیونگ لائسنس بنوائیں۔ شہری ڈرائیونگ لائسنس کے حصول کے لیے خدمت مراکز لائسنسنگ سینٹر آن لائن لائسنسنگ پورٹل سے فائدہ اٹھائیں۔