اپرکرم، بارودی سرنگ کا دھماکہ،4 افراد جاں بحق جبکہ چار زخمی ہوگئے

دھماکے کی اطلاع ملتے ہی بم ڈسپوزل اسکواڈ اور دیگر متعلقہ ادارے جائے وقوعہ پر پہنچ گئے، زخمیوں ولاشوں کو فوری طور پر ڈی ایچ کیو ہسپتال پاراچنار منتقل کیا گیا، متاثرہ افراد لکڑی لانے کیلئے پہاڑی علاقے کی طرف جا رہے تھے تو افسوسناک حادثہ پیش آیا

فیصل علوی بدھ 25 جون 2025 14:05

اپرکرم، بارودی سرنگ کا دھماکہ،4 افراد جاں بحق جبکہ چار زخمی ہوگئے

اپرکرم(اردوپوائنٹ اخبار تازہ ترین۔25جون 2025)اپرکرم میں بارودی سرنگ کے دھماکے میں 4افراد جاں بحق جبکہ چار زخمی ہوگئے،دھماکے کی اطلاع ملتے ہی بم ڈسپوزل اسکواڈ (بی ڈی ایس) اور دیگر متعلقہ ادارے جائے وقوعہ پر پہنچ گئے،زخمیوں ولاشوں کو فوری طور پر ڈی ایچ کیو ہسپتال پاراچنار منتقل کیا گیا جہاں ابتدائی طبی امداد کے بعد انہیں پشاور ریفر کر دیا گیا۔

زخمیوں کی حالت تشویشناک بتائی جا رہی ہے۔بتایاگیا ہے کہ افسوسناک حادثہ ضلع کرم کی تحصیل اپر کرم کے علاقے پیواڑ شرم خیل میں بارودی سرنگ کے دھماکہ اس وقت پیش آیا جب متاثرہ افراد لکڑی لانے کیلئے پہاڑی علاقے کی طرف جا رہے تھے۔ ڈسٹرکٹ پولیس افسر حبیب اللہ کے مطابق دھماکہ اپرکرم کے علاقے پیواڑشرم خیل میں ہوامقامی افرادپہاڑی راستے پر جارہے تھے۔

(جاری ہے)

ڈی پی او کایہ بھی کہنا ہے کہ دھماکے کے بعد علاقے کو گھیرے میں لے لیا گیا ہے اور مزید سرنگوں کے خدشے کے پیش نظر سرچ آپریشن شروع کر دیا گیا ہے تاکہ مزید سرنگوں کا سراغ لگایاجا سکے۔پولیس کے مطابق دھماکہ اس وقت ہوا جب متاثرہ افراد پہاڑ کی جانب جا رہے تھے کہ راستے میں نصب بارودی سرنگیں پھٹ گئیں۔حادثے میں متاثرہ زخمیوں نے بھی اس بات کی تصدیق کی ہ۔

کہ وہ روزمرہ کے معمول کے مطابق لکڑیاں لانے جا رہے تھے جب یہ افسوسناک واقعہ پیش آیا۔ڈی پی اوحبیب اللہ کامزید یہ بھی کہنا ہے کہ دھماکے کے بعد علاقے کو گھیرے میں لے کر شواہد اکٹھے کرنے کا عمل شروع کر دیا گیا ہے۔ واقعے کی ہر پہلو سے تحقیقات کی جا رہ ہیں۔ضلعی انتظامیہ نے بھی واقعے پر شدید تشویش کا اظہار کرتے ہوئے اسے امن عمل کو ثبوتاژ کرنے کی سازش قرار دیا ہے اور کہا ہے کہ مجرموں کو کیفر کردار تک پہنچایا جائے گا۔دوسری جانب علاقہ عمائدین نے واقعے کو انتہائی افسوسناک قرار دیا اور مطالبہ کیا کہ اس دہشتگرد کارروائی میں ملوث عناصر کو قانون کے کٹہرے میں لایا جائے۔ ان کا کہنا تھا کہ یہ واقعہ علاقے کے امن کو تباہ کرنے کی مذموم کوشش ہے۔