سرگودھا، کمشنر جہانزیب اعوان کا شاہ پور تا بھلوال روڈ منصوبے کا دورہ، ترقیاتی کاموں کی رفتار اور معیار کا جائزہ لیا

جمعرات 26 جون 2025 18:51

سرگودھا (اُردو پوائنٹ اخبارتازہ ترین - اے پی پی۔ 26 جون2025ء) کمشنر سرگودھا ڈویژن جہانزیب اعوان نے شاہ پور سے جھال چکیاں، لک موڑ کے راستے بھلوال تک تعمیر ہونے والی اہم سڑک کے جاری ترقیاتی کاموں کا معائنہ کیا۔ ایس ای ہائی ویز رانا عابد اور ایکیسن ملک گلفام اعوان ان کے ہمراہ تھے۔ محکمہ ہائی ویز کے افسران نے کمشنر کو بریفنگ میں مذکورہ سڑک کے کل تخمینہ جات اور اب تک کے استعمال فنڈز کی تفصیلات سے آگاہ کیا اور بتایا کہ سڑک کا 75 فیصد کام مکمل ہو چکا ہے۔

کمشنر سرگودھا نے موقع پر جاری تعمیراتی عمل کا تفصیلی جائزہ لیا اور کام کے معیار، رفتار اور ڈیزائن کے مطابق تکمیل بارے بریفنگ بھی لی ۔ اُنہوں نے متعلقہ افسران کو ہدایت کی کہ سڑک کی تعمیر میں معیار کو ہر صورت یقینی بنایا جائے تاکہ عوام کو ایک دیرپا اور محفوظ سفری سہولت فراہم کی جا سکے۔

(جاری ہے)

انہوں نے مزید کہا کہ سڑکوں کی تعمیر و بحالی حکومت پنجاب کی ترجیحات میں شامل ہے اور وزیرِاعلیٰ پنجاب مریم نواز شریف کی واضح ہدایت ہے کہ تمام ترقیاتی منصوبے شفافیت، معیار اور مقررہ وقت میں مکمل کیے جائیں۔

کمشنر نے متعلقہ حکام کو ہدایت کی کہ منصوبے کی جلد تکمیل کے لیے باقی ماندہ فنڈز کی بروقت دستیابی کو یقینی بنایا جائے اور منصوبے کو مانیٹر کرنے کا عمل مزید مؤثر بنایا جائے تاکہ کوئی تاخیر یا تکنیکی خامی نہ رہے۔ انہوں نے کہا کہ اس سڑک کی تکمیل سے نہ صرف شاہ پوراوربھلوال کے درمیان سفر کرنے والے ہزاروں افراد کو سہولت میسر آئے گی بلکہ علاقائی ترقی میں بھی تیزی آئے گی کیونکہ بہتر سڑکیں معیشت اور رابطے کی ترقی میں ریڑھ کی ہڈی کی حیثیت رکھتی ہیں۔