سندھ میں طالبات کو تعلیمی وظائف کی شفاف فراہمی کیلئے ریفارم سپورٹ یونٹ اور جاز میںشراکت

جمعرات 26 جون 2025 19:36

کراچی (اُردو پوائنٹ اخبارتازہ ترین - این این آئی۔ 26 جون2025ء)حکومت سندھ کے ریفارم سپورٹ یونٹ (RSU) نے صوبے میں بچیوں کی تعلیم تک رسائی بہتر بنانے کے ایک اہم اقدام کے تحت گرلز اسٹائپنڈ پروگرام کے تحت دو لاکھ بیس ہزار طالبات کے اہل خانہ کو 80 کروڑ روپے کے تعلیمی وظائف کی ادائیگی کا آغاز کر دیا ہے۔یہ رقوم جاز کیش کے ذریعے منتقل کی جا رہی ہیں، جو سندھ بھر میں موجود اپنے 75,000 سے زائد ایجنٹس کے نیٹ ورک کے ذریعے نچلی سطح پر بروقت، شفاف اور محفوظ ادائیگی کو یقینی بنا رہا ہے۔

ہر ادائیگی طالبہ کے اسکول میں داخلے کی تصدیق کے بعد کی جاتی ہے، جس کے بعد والدین یا سرپرست کو ایس ایم ایس کے ذریعے اہلیت کی اطلاع دی جاتی ہے۔ رقم صرف بایومیٹرک شناختی کارڈ کی تصدیق کے بعد جاری کی جاتی ہے، تاکہ پورا عمل قابلِ اعتماد اور باعزت انداز میں مکمل ہو۔

(جاری ہے)

جاز کیش نے بطور شراکت دار سندھ کے 45 تعلقوں میں اس پروگرام کو مؤثر، جامع اور آسان بنایا ہے۔

ریفارم سپورٹ یونٹ کے چیف پراجیکٹ منیجر، جنید حمید ساموں کا کہنا ہے کہ’’‘‘لڑکیوں کی تعلیم نہ صرف ان کا بنیادی حق ہے بلکہ یہ وسیع تر سماجی تبدیلی کا ذریعہ بھی ہے۔ جب ہم تعلیمی وظیفے کو اسکول میں داخلے سے مشروط کرتے ہیں، تو ہم صرف انفرادی طالبات کی مدد نہیں کرتے بلکہ پورے معاشرے میں ایک مثبت پیغام عام کرتے ہیں کہ ہر بچی کا اصل مقام اسکول ہے۔‘‘مرتضیٰ علی، صدر جاز کیش، نے اس موقع پر کہاکہ’’ ہماری کوشش ہے کہ ہر وظیفہ شفاف طریقے سے درست ہاتھوں تک پہنچے تاکہ یہ بچیاں تعلیم حاصل کر سکیں، بڑے خواب دیکھ سکیں اور روشن مستقبل بنا سکیں۔‘‘