وفاقی کابینہ کو اپنی تنخواہوں میں اپنی مرضی اور 'ضرورت' کے مطابق اضافے کا اختیارمل گیا

جمعہ 27 جون 2025 20:22

اسلام آباد (اُردو پوائنٹ اخبارتازہ ترین - آن لائن۔ 27 جون2025ء)وفاقی وزراء اور وزرائے مملکت کی تنخواہوں میں اضافے کے معاملے پر وفاقی کابینہ کو اپنی تنخواہوں میں اپنی مرضی اور 'ضرورت' کے مطابق اضافے کا اختیار مل گیا۔پارلیمنٹ نے وفاقی وزراء اور وزرائے مملکت کی تنخواہوں میں اضافے کی طریقہ کار میں تبدیلی کی منظوری دے دی۔

(جاری ہے)

فنانس بل کے مطابق وفاقی وزراء اور وزرائے مملکت کی تنخواہوں میں اضافہ مناسب وقفے کے بعد ضرورت کے مطابق کیا جائے گا، 1975 کے ایکٹ کے مطابق وفاقی وزراء اور وزرائے مملکت کی تنخواہوں میں اضافہ سول سرونٹس کی تنخواہوں میں اضافے سے مشروط تھا۔

گزشتہ روز فنانس بل کی منظوری کے دوران زہرہ ودود فاطمی کی متعارف کردہ ترمیم کی قومی اسمبلی نے کثرت رائے سے منظوری دی تھی۔ ترمیم کے ذریعے وفاقی وزراء اور وزرائے مملکت کی تنخواہوں میں ضروری وقت پر اضافے کا اختیار وفاقی کابینہ کو دے دیا گیا۔پارلیمنٹ نے حالیہ دنوں میں وفاقی وزراء اور وزرائے مملکت کی تنخواہوں میں اضافے کا اختیار وفاقی کابینہ کو دیا تھا۔