یکم محرم الحرام اور جمعتہ المبارک،پنجاب پولیس کے لاہور سمیت صوبہ بھر میں سرچ، سویپ، کومبنگ آپریشنز

529 کومبنگ آپریشنز، 18 ہزار 850 سے زائد مشتبہ افراد کی چیکنگ، 46 مشکوک افراد حراست میں لئے گئے

جمعہ 27 جون 2025 20:00

لاہور (اُردو پوائنٹ اخبارتازہ ترین - این این آئی۔ 27 جون2025ء) محرم الحرام اور جمعتہ المبارک کے تناظر میں پنجاب پولیس کے لاہور سمیت صوبہ بھر میں سرچ، سویپ اور کومبنگ آپریشنز جاری ہیں جس کے تسلسل میں گذشتہ 24 گھنٹوں کے دوران 529 کومبنگ آپریشنز، 18 ہزار 850 سے زائد مشتبہ افراد کی چیکنگ اور 46 مشکوک افراد حراست میں لئے گئے۔ ترجمان پنجاب پولیس تفصیلات سے آگاہ کرتے ہوئے بتایا کہ 25 سرچ اینڈ سویپ آپریشنز، 2650 سے زائد افراد سے پوچھ گچھ اور 03 مشتبہ افراد حراست میں لیے گئے۔

(جاری ہے)

سنگین جرائم میں ملوث 306 اشتہاری، 106 عدالتی مفرور اور 133 عادی مجرمان بھی گرفتار کیے گئے۔ ترجمان پنجاب پولیس نے مزید بتایا کہ جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں۔ جرائم پیشہ افراد کے خلاف کاروائیوں کے دوران 10 مجرم کیفر کردار کو پہنچے جبکہ 06 کو زخمی حالت میں گرفتار کیا گیا ۔ آئی جی پنجاب نے کہا کہ محرم الحرام کے دوران ملک دشمن و جرائم پیشہ عناصر کا محاسبہ کرنے کیلئے سرچ، سویپ اینڈ کومبنگ آپریشنز جاری رکھے جائیں۔