ڈی جی نیب لاہور کی زیر صدارت کھلی کچہری کا انعقاد

لاہور (اُردو پوائنٹ اخبارتازہ ترین - اے پی پی۔ 28 جون2025ء) قومی احتساب بیورو (نیب) لاہور کے ڈائریکٹر جنرل غلام صفدر شاہ نے عہدہ سنبھالنے کے بعد نیب لاہور بیورو میں پہلی کھلی کچہری کا انعقاد کیا جہاں پونزی سکیموں اور مبینہ جعلی ہائوسنگ سوسائٹیوں کے شکار متاثرین نے دادرسی کیلئے بھرپور شرکت کی۔ہفتہ کو ترجمان کے مطابق کھلی کچہری میں بحریہ کوزین، بلنک کیپیٹل انویسٹمنٹ (بی سی آئی) ، الرحمن گارڈن فیز-4، نیولاہور سٹی ، الجلیل گارڈن ،خیابانِ امین ہائوسنگ سوسائٹی، گرینڈایونیو ہا ئوسنگ سوسائٹی ، پاک عرب ہائوسنگ سوسائٹی، اومیگا ریزیڈینشیا ہائوسنگ سوسائٹی کے متاثرین نے شرکت کی۔

ڈی جی نیب لاہور نے تمام متاثرین کی شکایات کو سنا اور موقع پر ہی دادرسی کیلئے احکامات جاری کئے۔

(جاری ہے)

ترجمان کے مطابق بحریہ کوزین نامی میگا سکینڈل کے شکار متاثرین کی درخواست پر ڈی جی نیب لاہور نے فوری طور پر سی سی پی او لاہور آفس سے مذکورہ سکینڈل میں نامزد ملزمان کیخلاف درج تمام ایف آئی آرز مزید کارروائی کیلئے نیب لاہور میں منگوا نے کے احکامات جاری کئے، علاوہ ازیں مرکزی ملزمان کیخلاف اخبارات میں اشتہار کے اجرا اور متاثرین کی سہولت کیلئے نیب ٹیم ڈھیرکی روانہ کرنے کا عندیہ بھی دیا۔

متاثرین کی درخواست پر ڈی جی نیب لاہور کی جانب سے بحریہ کوزین انتظامیہ کیخلاف شکایات کی تحقیقات کے آغاز کا حکم دیاہے۔کھلی کچہری میں شریک نیولاہور سٹی کے تمام متاثرین کی شکایات انفرادی طور پر حل کرکے رپورٹ پیش کرنے کے احکامات جاری کئے گئے تاہم ڈی جی نیب لاہور کی جانب سے آئندہ ماہ کھلی کچہری سے قبل متاثرین کی شکایات پر عملی اقدامات کے آغاز اور مداوا نہ ہونیکی صورت میں سوسائٹی انتظامیہ کو متاثرین کے روبرو بٹھانے کے احکامات جاری کئے گئے ہیں۔

ڈی جی نیب لاہور غلام صفدر شاہ نے کہا کہ "آئندہ کسی متاثرہ شہری کو دادرسی کیلئے ہائوسنگ سوسائٹی انتظامیہ آفس چکر لگانے کی ضرورت نہیں ہوگی"۔ اسی طرح خیابانِ امین ہائوسنگ سوسائٹی سکینڈل متاثرین کے حوالہ سے چیئرمین نیب کی جانب سے جاری کردہ ہدایات سے آگاہ کرتے ہوئے کہا کہ نیب مرکزی ملزم اللہ دتہ ہیرا کے ایسے تمام متاثرین جنہوں نے انتظامیہ کو 50فیصد سے زائد ادائیگی کر رکھی ہے انہیں عنقریب ادا شدہ رقم کے تین گنا کے برابر ریکوری ممکن بنائے گا۔

کھلی کچہری میں گرینڈایونیو ہائوسنگ سوسائٹی متاثرین کی جانب سے ریکوری اور ریفنڈ میں تاخیر کی شکایات پر ڈی جی نیب لاہور نے ملزمان کی ضبط شدہ جائیدادوں کی فروخت کے حوالہ سے ہونیوالی پیش رفت پر جامع بریفنگ طلب کرتے ہوئے کہا کہ نیب لاہور مذکورہ سکینڈل میں فوری ریکوری کیلئے ملزمان کی ضبط شدہ جائیدایں ازخود فروخت کروا کر متاثرین کی مکمل ریکوری یقینی بنائے گا۔

ڈی جی نیب لاہور نے الجلیل گارڈن انتظامیہ کیخلاف متاثرین کی جانب سے ری فنڈ میں مشکلات اور کیس کی تحقیقات میں ہونیوالی ابتک کی پیش رفت پر بریفنگ طلب کر لی۔ الرحمن گارڈن فیز-4 کے متاثرین کو آگاہ کرتے ہوئے کہا کہ مذکورہ سکینڈل کی تحقیقات آخری مراحل میں داخل ہو چکی تاہم عنقریب اہم پیشرفت بھی متوقع ہے۔اس موقع پر ڈی جی نیب لاہور غلام صفدر شاہ نے کھلی کچہری میں موجود متاثرین کو مخاطب کرتے ہوئے کہا کہ چیئرمین نیب نے عوام سے دھوکہ دہی کے مرتکب عناصر کیخلاف زیرو ٹالرنس پالیسی اپنانے کے احکامات جاری کئے ہیں جن پر مِن و عن عملدرآمد کروایا جائے گا ۔

انہوں نے کہا کہ نیب کی اولین ترجیح متاثرین کے نقصانات کا ازالہ ہے تاہم "عوام دوست نیب" کے ویژن کی ترویج کیلئے اقدامات اٹھائے جا رہے ہیں۔