پاکپتن میں 6 روز میں 20 نومولود جاں بحق، ابتدائی انکوائری میں ڈاکٹرز اور نرسز کو کلین چٹ دیدی گئی

کمشنر ساہیوال نے نوٹس لیتے ہوئے 3 رکنی انکوائری کمیٹی تشکیل دیدی، کمیٹی 2 جولائی کو رپورٹ کمشنر کو پیش کرے گی

ساجد علی اتوار 29 جون 2025 12:19

پاکپتن میں 6 روز میں 20 نومولود جاں بحق، ابتدائی انکوائری میں ڈاکٹرز ..

پاکپتن ( اُردو پوائنٹ اخبارتازہ ترین۔ 29 جون 2025ء ) صوبہ پنجاب کے ضلع پاکپتن کے سرکاری ہسپتال میں 6 روز میں 20 نومولود جاں بحق ہونے کے معاملے میں ابتدائی انکوائری میں ڈاکٹرز اور نرسز کو کلین چٹ دے دی گئی۔

(جاری ہے)

تفصیلات کے مطابق پاکپتن میں 6 روز میں 20 نومولود جان کی بازی ہار گئے، بچوں کی اموات 16 سے 22 جون کے درمیان ہوئیں، ورثاء نے الزام عائد کیا کہ بچوں کی اموات آکسیجن سلنڈرز کی کمی، ڈاکٹرز اور پیرامیڈیکس کی نااہلی کے باعث ہوئی، تاہم ابتدائی انکوائری میں ڈاکٹرز اور نرسز کو کلین چٹ دیتے ہوئے عملے کی تربیت کی سفارش کردی گئی۔

بتایا گیا ہے کہ ڈسٹرکٹ ہسپتال پاکپتن میں 20 بچوں کی اموات پر کمشنر ساہیوال نے نوٹس لے لیا، کمشنر ساہیوال نے واقعہ کا نوٹس لیتے ہوئے 3 رکنی انکوائری کمیٹی تشکیل دی ہے، کمیٹی 2 جولائی کو رپورٹ کمشنر کو پیش کرے گی۔ یاد رہے کہ پاکپتن کے ڈسٹرکٹ ہسپتال میں حالیہ دنوں میں مبینہ طور پر طبی سہولیات کی عدم دستیابی اور غفلت کے باعث 20 بچوں کی اموات کی گزشتہ روز نشاندہی ہوئی جس پر میڈیا اور سول سوسائٹی کی جانب سے شدید ردعمل سامنے آیا۔