سجاول: منشیات فروشوں کے خلاف کارروائی مہنگی پڑ گئی، پولیس پارٹی یرغمال

اتوار 29 جون 2025 16:05

سجاول(اُردو پوائنٹ اخبارتازہ ترین - این این آئی۔ 29 جون2025ء)سجاول کے گائوں علی نواز مگسی میں منشیات فروشوں کے ٹھکانے پر کارروائی سی آئی اے پولیس کو مہنگی پڑ گئی، ملزمان نے پولیس پارٹی کو یرغمال بنا لیا، کئی گھنٹوں بعد بازیابی ممکن ہوسکی۔تفصیلات کے مطابق سی آئی اے پولیس نے چھاپے کے دوران ایک منشیات فروش کو گرفتار کر لیا، تاہم، اس دوران ملزمان نے انچارج سی آئی اے ٹیم وحید مراد چانڈیو اور دیگر اہلکاروں کو یرغمال بنا لیا اور ان پر شدید تشدد کیا۔

کئی گھنٹے کی کشمکش کے بعد پولیس اور سکیورٹی اداروں کی مشترکہ کارروائی کے نتیجے میں انچارج سی آئی اے وحید چانڈیو کو بازیاب کرا لیا گیا۔سی آئی اے انچارج وحید مراد چانڈیو نے بیان دیا کہ تقریبا تیس چالیس افراد نے انہیں گھیر کر اغوا کیا اور تشدد کا نشانہ بنایا۔

(جاری ہے)

بازیابی کے بعد پولیس نے ملزمان کے خلاف اغوا، تشدد اور منشیات فروشی کے مقدمات درج کئے ہیں، ملزمان کے خلاف مزید کارروائیاں جاری ہیں۔

انچارج سی آئی سے وحید مراد چانڈیو نے اس عزم کا اظہار کیا کہ منشیات فروشوں کو جلد گرفتار کر کے علاقے سے منشیات ختم کریں گے۔انتظامیہ نے بھی کہا ہے کہ ملزمان کے خلاف تین مختلف مقدمات درج کیے گئے ہیں، جن میں اغوا، تشدد اور منشیات سے متعلق الزامات شامل ہیں، اور علاقے میں صفائی مہم جاری رکھی جائے گی۔