(ن) لیگ نے پختونخوا اسمبلی میں مخصوص نشستوں کی تقسیم عدالت میں چیلنج کردی

جے یو آئی (ف) کو 7سیٹوں پر 10 ، (ن) لیگ کو 7جنرل سیٹوں پر 8 مخصوص نشستیں دی گئی ہیں، مؤقف

جمعہ 4 جولائی 2025 13:04

پشاور(اُردو پوائنٹ اخبارتازہ ترین - این این آئی۔ 04 جولائی2025ء)مسلم لیگ (ن)کی جانب سے پختونخوا اسمبلی میں مخصوص نشستوں کی تقسیم عدالت میں چیلنج کردی گئی۔ذرائع کے مطابق خیبرپختونخوا اسمبلی میں مخصوص نشستوں کی تقسیم کا معاملہ الجھ گیا۔ مسلم لیگ (ن) نے الیکشن کمیشن کی مخصوص نشستوں کی تقسیم کو پشاور ہائی کورٹ میں چیلنج کردیا۔

(جاری ہے)

مسلم لیگ (ن) نے بیرسٹر ثاقب رضا کی وساطت سے درخواست دائر کی ہے، جس میں مؤقف اختیار کیا گیا کہ مسلم لیگ(ن) کی خیبرپختونخوا اسمبلی میں 7 سیٹیں ہیں، الیکشن کمیشن نے جمعیت علمائے اسلام (ف) کو 7سیٹوں پر 10مخصوص نشستیں دی ہیں جب کہ مسلم لیگ (ن) کو 7جنرل سیٹوں پر 8 مخصوص نشستیں دی گئی ہیں۔

درخواست میں کہا گیا کہ مسلم لیگ نے صوبے میں 6 نشستیں جیتی ہیں، ایک آزاد ایم پی اے بھی 3 دن کے اندر شامل ہوا ہے، الیکشن کمیشن نے مسلم لیگ (ن) کو 6نشستوں کے تناسب سے مخصوص نشستیں دی ہیں۔مسلم لیگ (ن) کی درخواست میں استدعا کی گئی کہ مخصوص نشستوں سے متعلق الیکشن کمیشن کا اعلامیہ کالعدم قرار دیا جائے،عدالت الیکشن کمیشن کو دوبارہ تقسیم سے متعلق احکامات جاری کرے اوردرخواست پر حتمی فیصلے تک مخصوص نشستوں پر منتخب ارکان کو حلف سے روکا جائے۔