شبمن گل کی غلطی سے بھارتی بورڈ کو لالے پڑ گئے، 250 کروڑ روپے نقصان کا خدشہ

بی سی سی آئی کی جانب سے ٹیسٹ کپتان کو شوکاز نوٹس دیے جانے کا امکان

ذیشان مہتاب پیر 7 جولائی 2025 12:47

شبمن گل کی غلطی سے بھارتی بورڈ کو لالے پڑ گئے، 250 کروڑ روپے نقصان کا ..

برمنگھم (اردو پوائنٹ تازہ ترین اخبار ۔ 7 جولائی 2025ء ) ایجبسٹن ٹیسٹ میں شاندار کارکردگی دکھانے والے بھارتی کپتان شبمن گل ایک بڑی مشکل میں پھنس سکتے ہیں اور انکی یہ غلطی بھارتی بورڈ کو 250 کروڑ روپے کے نقصان سے دوچار کر سکتی ہے۔

شبمن گل نے دوسرے ٹیسٹ میچ کی دونوں اننگز میں مجموعی طور پر 430 رنز بنائے جس میں پہلی اننگز میں 269 اور دوسری میں 161 رنز شامل ہیں۔

ان کی شاندار بیٹنگ کی بدولت بھارت نے فتح حاصل کی۔ تاہم بھارت کی دوسری اننگز کے دوران جب ٹیم نے 427/6 پر اننگز ڈیکلیئر کی، تو شبمن گل ڈریسنگ روم سے باہر کیمرے کے سامنے سپورٹس برانڈ نائکی کی ٹائٹس پہن کر آئے، جو بی سی سی آئی کے اسپانسر معاہدے کی خلاف ورزی ہے۔

واضح رہے کہ بی سی سی آئی کا موجودہ کِٹ اسپانسر ایڈیڈاس ہے اور تمام کھلاڑیوں پر لازم ہے کہ وہ صرف ایڈیڈاس کا لباس یا سامان استعمال کریں۔

(جاری ہے)

شبمان گل کے نائکی کی پراڈکٹ پہن کر میدان میں آنے سے ایڈیڈاس کے ساتھ کیے گئے 250 کروڑ روپے کے معاہدے پر اثر پڑ سکتا ہے۔ یہ معاہدہ 2023ء سے مارچ 2028ء تک کے لیے ہے اور شبمان گل کا یہ عمل معاہدے کی خلاف ورزی کے زمرے میں آتا ہے۔

میڈیا رپورٹس کے مطابق قانونی طور پر ایڈیڈاس معاہدہ ختم کرنے اور ہرجانہ طلب کرنے کا اختیار رکھتا ہے کیونکہ اسپانسر شپ کی شرائط کی خلاف ورزی ہوئی ہے۔

تاہم، چونکہ بی سی سی آئی دنیا کا امیر ترین کرکٹ بورڈ ہے اس لیے ایڈیڈاس کے لیے بھی یہ شراکت داری فائدے مند ہے۔

امکان یہی ہے کہ ایڈیڈاس بورڈ اور کھلاڑی کو محض وارننگ دے کر معاملہ رفع دفع کر دے گا۔ بی سی سی آئی کی جانب سے شبمن گل کو ممکنہ طور پر نوٹس بھیجا جائے گا تاکہ وہ اپنی وضاحت پیش کر سکیں۔