ٹیکساس میں یوم عاشور کا جلوس، ہزاروں عزادار شریک

ہیوسٹن میں مرکزی جلوس کا اہتمام انجمن پاسبانِ عزا کی جانب سے کیا گیا

پیر 7 جولائی 2025 16:53

ٹیکساس(اُردو پوائنٹ اخبارتازہ ترین - این این آئی۔ 07 جولائی2025ء)امریکی ریاست ٹیکساس کے مختلف شہروں میں آج یومِ عاشورہ کے موقع پر نواسہ رسول حضرت امام حسین رضی اللہ تعالی عنہ اور ان کے باوفا ساتھیوں کی عظیم قربانی کی یاد میں جلوسِ عزا برآمد ہوئے۔میڈیارپورٹس کے مطابق ہیوسٹن اور ڈیلس میں ہونے والے ان جلوسوں میں ہزاروں عزاداروں نے شرکت کی، جہاں ہر دل پرسوز، ہر آنکھ اشکبار اور ہر سینہ ماتم گاہ بنا نظر آیا۔

ہیوسٹن میں مرکزی جلوس کا اہتمام انجمن پاسبانِ عزا کی جانب سے کیا گیا، جہاں شہر بھر سے مختلف مذہبی و عزاداری تنظیموں، انجمنوں اور اداروں نے شرکت کی۔مرد، خواتین اور بچے سیاہ لباس میں ملبوس، سر جھکائے، دلوں میں کربلا کا درد لیے، حق کے پیغام کو بلند کرنے کے لیے لبیک یا حسین رضی اللہ تعالی عنہ کی صدا کے ساتھ شریک ہوئے۔

(جاری ہے)

جلوس کے راستے میں جگہ جگہ تعزیے، علم مبارک، تابوت اور پانی کی سبیلیں لگائی گئی تھیں، جن کے گرد عزاداروں کا ہجوم عقیدت و احترام سے سرشار دکھائی دیا۔

ڈیلس میں عاشورہ کا جلوس انجمن سرکارِ وفا کی قیادت میں ڈاون ٹاون کے جان ایف کینیڈی میموریل کے سامنے سے برآمد ہوا، اس جلوس کی قیادت معروف سماجی و مذہبی شخصیت علی رضوی نے کی۔جلوس میں مومن سینٹر، علم سینٹر اور درِ حسین سے وابستہ عزاداروں سمیت ہزاروں مومنین و مومنات، خواتین، بزرگ اور بچوں نے شرکت کی۔علمائے کرام نے جلوس کے شرکا سے خطاب میں سانحہ کربلا کے مختلف پہلووں پر روشنی ڈالی اور کہا کہ امام حسین رضی اللہ عنہ کے یزید جیسے ظالم حکمراں کے سامنے کلمہ حق بلند کر کے صرف تاریخ نہیں بدلی بلکہ انسانیت کو جبر کے خلاف کھڑے ہونے کا پیغام دیا۔

مومنین کا کہنا تھا کہ عاشورہ کا جلوس صرف غمِ حسین کا اظہار نہیں بلکہ ظالم کے سامنے ڈٹ جانے کا عہد ہے، یہ جلوس نسلِ نو کو وہ پیغام دیتا ہے جو کربلا کے میدان میں حضرت امام حسین رضی اللہ نے اپنے لہو سے تحریر کیا کہ ظلم کے سامنے جھکنا گناہ ہے اور حق کے لیے قربانی دینا فخر ہے۔