باجوڑ، بونیر، دیر اور ضلع مالاکنڈ میں تجاوزات کےخلاف آپریشن، متعدد عمارتیں سیل

پیر 7 جولائی 2025 18:24

پشاور (اُردو پوائنٹ اخبارتازہ ترین - اے پی پی۔ 07 جولائی2025ء) سانحہ سوات کے بعد مالاکنڈ ڈویژن میں تجاوزات کے خلاف جاری آپریشن کی رپورٹ خیبرپختونخوا حکومت کو موصول ہوگئی۔مالاکنڈ ڈویژن میں تجاوزات کے خلاف آپریشن کی رپورٹ میں ڈویژن کے 6 اضلاع میں 501 کنال اور سوات میں 203 کنال زمین پر تجاوزات کا انکشاف ہوا ہے۔ رپورٹ میں بتایا گیا ہے کہ باجوڑ، بونیر، دیر اور ضلع مالاکنڈ میں تجاوزات کےخلاف آپریشن کیا گیا، اس دوران مالاکنڈ کے 6 اضلاع میں 61 عمارتوں کو سیل کیاگیا۔

رپورٹ کے مطابق سوات میں ایک عمارت سیل اور 20 کنال سے زیادہ رقبے پرعمارتیں گرادیں، سوات میں 203 کنال سے زیادہ رقبے پر تجاوزات ہیں جن میں سے 78 کنال کو کلیئرکردیا گیا ہے جب کہ سوات میں 8 کلومیٹر سےزیادہ رقبے کی حدبندی کی ہے۔

(جاری ہے)

رپورٹ میں مزید بتایا گیا کہ باجوڑ میں 15، بونیر میں 9، لوئر دیر میں 22، اپر دیر میں 10 اور ضلع مالاکنڈ میں 4 عمارتیں سیل کی گئیں جب کہ مجموعی طورپر 75 کنال سے زیادہ رقبے پر تجاوزات میں آنے والی عمارتیں گرادی گئی ہیں۔

رپورٹ کے مطابق مالاکنڈ ڈویژن میں 501 کنال سے زیادہ رقبے پر تجاوزات ہیں، 162 کنال سے زیادہ رقبے سے تجاوزات کا خاتمہ کیا گیا، 115 کلومیٹر سے زیادہ رقبےکی حد بندی کی اور 54 مقامات پرباڑ لگادی گئی ہے۔ اس حوالے سے کمشنر مالاکنڈ ڈویژن عابد وزیر نے میڈیا سے گفتگو کرتے ہوئے بتایا کہ مالاکنڈ ڈویژن میں تجاوازت کے خلاف بلا امتیاز کارروائیاں جاری ہیں، وزیراعلیٰ کی سخت ہدایت ہے کہ کسی سے رعایت نہ برتی جائے۔