مظفر آباد، مشیر حکومت نثارہ عباسی سے مسلم لیگ (ن)خواتین ونگ کی ڈویژنل صدر حسنہ نوراوردیگر کی ملاقات

جمعہ 11 جولائی 2025 22:01

مظفرآباد (اُردو پوائنٹ اخبارتازہ ترین - اے پی پی۔ 11 جولائی2025ء) مشیر حکومت برائے سروسز اینڈ جنرل ایڈمنسٹریشن نثارہ عباسی سے مسلم لیگ (ن) خواتین ونگ کی ڈویژنل صدر حسنہ نور، ممتاز قانون دان ساجد عباسی، لچھراٹ سے مسلم لیگ (ن) کے رہنما عارف عباسی نے ملاقات کی۔ ملاقات میں وفد نے نثارہ عباسی کو بتایا کہ ڈسٹرکٹ کورٹس کی نلوچھی شفٹنگ کے بعد وکلاء اور کلائنٹس کو نقل وحمل کی شدید مشکلات ہیں،ڈسٹرکٹ کورٹس کی شہر سے دوری کے باعث اور بروقت سواری نہ ملنے کی وجہ سے بعض اوقات ضروری کام رہ جاتے ہیں۔

انہوں نے مشیر حکومت کو شہریوں کو درپیش مسائل سے آگاہ کرتے ہوئے کہا کہ چھتر سے نلوچھی کورٹ تک سسپنشن برج کے ذریعے عوام کو درپیش سفری مسائل کم کئے جاسکتے ہیں اور نیلم سٹیڈیم سے جوڈیشل کمپلیکس تک سڑک کی تعمیر بھی انتہائی ضروری ہے تاکہ ڈسٹرکٹ کمپلیکس تک شہر سے آسان رسائی ممکن ہو سکے۔

(جاری ہے)

اس موقع پر نثارہ عباسی نے کہا کہ اس معاملے کو متعلقہ حکام کے سامنے اٹھا کر حل کرنے کے لیے وہ اپنا بھرپور کردار ادا کرینگی۔

انہوں نے کہا کہ حکومت عام آدمی کی مشکلات کم کرنے کے لیے کوشاں ہے،دارالحکومت سمیت آزادکشمیر کے ہر حلقے میں ترقیاتی کام جاری ہیں،حکومت نے تمام حلقوں میں بلا تخصیص ترقیاتی کاموں کیلئے فنڈز کی فراہمی یقینی بنائی ہے۔ انہوں نے کہا کہ خواتین کے مسائل کو ترجیحی بنیادوں پر حل کرنے کیلئے حکومت نے اقدامات اٹھائے ہیں ۔