ق*ڈی سی لاہور کے شالیمار دورے، صفائی، تجاوزات اور سیوریج نظام کی بہتری کی ہدایت

۔سید موسیٰ رضا کا الصبح شالیمار تحصیل کے علاقوں کا دورہ،صفائی کی ناقص صورتحال پر برہمی ، واسا و ایل ڈبلیو ایم سی کو ہدایات

جمعہ 11 جولائی 2025 21:10

} لاہور (اُردو پوائنٹ اخبارتازہ ترین - آن لائن۔ 11 جولائی2025ء)ڈپٹی کمشنر لاہور سید موسیٰ رضا نے شہر کے انتظامی امور کا جائزہ لینے کے لیے روزانہ کی بنیاد پر مختلف تحصیلوں کے دورے شروع کر رکھے ہیں۔ اس سلسلے میں آج صبح انہوں نے تحصیل شالیمار کے مختلف علاقوں کا دورہ کیا۔اس موقع پر سی او ایم سی ایل شاہد عباس کاٹھیا، اسسٹنٹ کمشنر شالیمار محمد ثاقب ترازی اور دیگر افسران بھی ان کے ہمراہ تھے۔

ڈی سی لاہور نے کرول گھاٹی، محمود بوٹی، سوئی والا روڈ، گڑھی شاہو فلائی اوور اور حاجی کیمپ کا تفصیلی معائنہ کیا۔محمود بوٹی میں واسا کے ڈسپوزل سسٹم کا جائزہ لیتے ہوئے واسا حکام نے انہیں موجودہ صورتحال پر بریفنگ دی۔ ڈی سی لاہور نے واسا کو ہدایت دی کہ سیوریج اور نکاسی آب کے مسائل ترجیحی بنیادوں پر حل کیے جائیں۔

(جاری ہے)

انہوں نے صفائی کی ناقص صورتحال پر ایل ڈبلیو ایم سی حکام پر برہمی کا اظہار کیا اور ہدایت کی کہ صفائی کے عمل میں کوئی کوتاہی نہ برتی جائے، کوڑا کرکٹ مقررہ ڈمپنگ سائٹس پر ہی پہنچایا جائے۔

تجاوزات کی موجودگی پر ڈی سی لاہور نے سخت ناراضی کا اظہار کرتے ہوئے متعلقہ ایم او آر اور اسسٹنٹ کمشنر کو فوری اور مؤثر آپریشنز کی ہدایت کی، نیز تجاوزات کی مستقل نگرانی اور خاتمے کے لیے لائحہ عمل مرتب کرنے کی بھی ہدایت دی۔ڈی سی لاہور نے اس عزم کا اظہار کیا کہ شہری مسائل کے حل کے لیے انتظامی ٹیم متحرک اور متفق ہے، اور تمام اداروں کی کارکردگی کو روزانہ کی بنیاد پر جانچا جائے گا۔

متعلقہ عنوان :