پی ٹی آئی تحریک کا آغاز لاہور سے ہوگا، بڑی تعداد میں قیادت لاہور میں پہنچ گئی

لاہور ( اردوپوائنٹ اخبار تازہ ترین۔ آئی پی اے ۔ 12 جولائی 2025ء ) رہنماء پی ٹی آئی علی محمد خان نے کہا ہے کہ پی ٹی آئی تحریک کا آغاز لاہور سے ہوگا، بڑی تعداد میں قیادت لاہور میں پہنچ گئی ،علی امین کو عمران خان نے وزیراعلیٰ بنایا، مولانا نے بڑی عجیب بات کی اگر ہم مطالبہ کریں کہ فضل الرحمان کی جگہ مولانا شیرانی کو سربراہ بنادیں ، پھر کیسا لگے گا؟ انہوں نے جیو نیوز کے پروگرام میں گفتگو کرتے ہوئے کہا کہ جنوبی پنجاب اور خیبرپختونخواہ سے بڑی تعداد میں قیادت لاہور میں پہنچ گئی ہے، اس میں ارکان اسمبلی بھی ہیں، پنجاب پاکستان کی سیاست کا گڑھ ہے، پوری تحریک انصاف اور قوم ایک ہیں، بڑی تحریکوں کا آغاز لاہور سے ہوا ہے، کہا جاتا تھا پنجاب نکلے گا تو عمران خان نکلے گا ، پنجاب کی بڑی تعداد عمران خان کے ساتھ ہے، لیکن یہاں فسطائیت کی انتہاء ہے، جس تحریک کا آغاز لاہور سے ہو وہ کامیاب ہوتی ہے۔

(جاری ہے)

پی ٹی آئی کے ساتھ بڑی زیادتی ہوئی، مخصوص نشستیں ہمیشہ جیتی سیٹوں کے تناسب سے ملتی ہیں، ایسے کبھی نہیں ہوتا ایک جماعت نے تین سیٹیں جیتی ہوں ان کو 10مخصوص نشستیں مل جائیں۔ کوئی سیاسی لیڈر یہ نہیں کہہ سکتا کہ وزیراعلیٰ تبدیل کریں پھر ساتھ چلیں گے،ہر جماعت کا اپنا لیڈر فیصلہ کرتا ہے۔ علی امین کو عمران خان نے وزیراعلیٰ بنایا، مولانا نے بڑی عجیب بات کی ہے، اگر ہم مطالبہ کریں کہ فضل الرحمان کی جگہ مولانا شیرانی کو سربراہ بنادیں ، پھر ان سے بات کریں گے یہ تو کوئی بات نہ ہوئی۔

مولانا کی سیاست پر ہمیشہ داغ لگتا رہا ہے وہ جن کے ساتھ ہوتے ہیں ان کو بھی نہیں پتا ہوتا کہ وہ کس کے ساتھ ہیں۔انہیں خود فیصلہ کرنا چاہیئے کہ وہ تاریخ کے کس دھارے میں کھڑا ہونا چاہتے ہیں۔ مزید برآں پاکستان تحریک انصاف رہنما سلمان اکرم راجہ نے کہا ہے کہ بانی پی ٹی آئی کے بیٹوں کا واپس آنا ان کا بنیادی حق ہے، وہ آئیں گے۔ کے پی ہاؤس کے باہر میڈیا سے گفتگو کرتے ہوئے سلمان اکرم راجہ نے کہا کہ قافلہ صرف گفتگو کرنے کے لیے لاہور روانہ ہو رہا ہے، اب میٹنگ ہوگی اس کے بعد واپس آئیں گے۔

سلمان اکرم راجہ نے کہا کہ ملک کی معاشی اور سیاسی صورتحال پر گفتگو ہوگی، آرٹیکل 19 ہمارا بنیادی حق ہے یہ حق ہم سے چھین لیا گیا۔انہوں نے کہا کہ ہماری خواہش ہے ہم لوگوں کے ساتھ بیٹھیں، ان کے مسائل سنیں۔ علاوہ ازیں عامر ڈوگر نے کہا کہ جہلم کے پاس نمازِ ظہر ادا کی جائے گی، رات کو پارٹی قیادت لاہور میں رہے گی۔ انہوں نے کہا کہ خیبر پختونخوا کے رہنماؤں کی رہائش کا انتظام کیا گیا ہے۔