اے ٹی سی راولپنڈی کا اپوزیشن لیڈر عمر ایوب کو گرفتار کر کے پیش کرنے کا حکم

منگل 15 جولائی 2025 16:46

راولپنڈی (اُردو پوائنٹ اخبارتازہ ترین - اے پی پی۔ 15 جولائی2025ء) راولپنڈی کی انسداد دہشت گردی کی عدالت نے قومی اسمبلی میں اپوزیشن لیڈر عمر ایوب کو گرفتار کر کے عدالت میں پیش کرنے کا حکم دے دیا۔تفصیلات کے مطابق منگل کو انسداد دہشت گردی کی عدالت نے 24 اور 26 نومبر کے 14 مقدمات میں اپوزیشن لیڈر عمر ایوب کی عبوری ضمانتوں کی درخواست پر سماعت کی۔

(جاری ہے)

خصوصی عدالت کے جج امجد علی شاہ نے سماعت کی۔عدالت نے اپوزیشن لیڈر کی 14 مقدمات میں عبوری ضمانتیں خارج کرتے ہوئے انہیں گرفتار کر کے پیش کرنے کا حکم دیا۔اے ٹی سی نے رہنما پی ٹی آئی اور ان کی کونسل کی عدم پیروی پر ضمانتیں خارج کیں جس کے بعد ان کی گرفتاری کا حکم جاری کیا۔ واضح رہے کہ اپوزیشن لیڈر عمر ایوب نے مذکورہ مقدمات میں وکیل بابر عوان کے ذریعے درخواستیں دائرکر رکھی تھیں ، وہ 24 اور 26 نومبر کے 14مقدمات میں عبوری ضمانت پر تھے۔