2لاکھ روپے بینک میں جمع کروانے پر ٹیکس کٹوتی نہیں ہو گی،ایف بی آر

ڈیجیٹل انوائسنگ چھوٹے تاجروں اور ریٹیلرز پر لاگو نہیں ہوگی، ایف بی آر کی آل پاکستان تنظیم تاجران کو یقین دہانی

منگل 15 جولائی 2025 22:15

2لاکھ روپے بینک میں جمع کروانے پر ٹیکس کٹوتی نہیں ہو گی،ایف بی آر

․اسلام آباد(اُردو پوائنٹ اخبارتازہ ترین - این این آئی۔ 15 جولائی2025ء)ایف بی آر نے بتایاہے کہ 2لاکھ روپے بینک میں جمع کروانے پر ٹیکس کٹوتی نہیں ہو گی۔رپورٹ کے مطابق ایف بی آر کی جانب سے یہ یقین دہانی اسلام آباد میں آل پاکستان تنظیم تاجران کے وفد کے ایف بی آر حکام سے مذاکرات میں کرائی گئی۔ایف بی آر نے یقین دہانی کرائی کہ ڈیجیٹل انوائسنگ چھوٹے تاجروں اور ریٹیلرز پر لاگو نہیں ہوگی، ڈیجیٹل انوائسنگ صرف بزنس ٹو بزنس سیلز ٹیکس رجسٹرڈ کمپنیوں پر مرحلہ وار لاگو ہو گی۔

ایف بی آر کے مطابق ڈیجیٹلائزیشن کمیٹی میں تاجر نمائندوں کو شامل کیا جائے گا، سیلز ٹیکس قانون 37اے اور 37بی کا اطلاق چھوٹے تاجروں پر نہیں ہو گا۔فیڈرل بورڈ آف ریونیو کے مطابق کسی بڑے صنعت کار کو بھی سیلز ٹیکس قانون کے تحت گرفتار نہیں کیا جائے گا، سیلز ٹیکس قانون 37اے اور 37بی کا مقصد جعلی انوائسز کی روک تھام ہے۔

(جاری ہے)

ایف بی آر نے کہاکہ مارکیٹوں میں کسٹم کے چھاپوں کے خلاف الگ اجلاس میں نیا میکنزم طے ہو گا، اس حوالے سے ملاقات میں اس پر اتفاق کیا گیا ہے۔

فیڈرل بورڈ آف ریونیو کے مطابق موبائل فونز پر ٹیکس اصلاحات کیلیے تاجروں سے مشاورت کی جائے گی۔اعلامیے میں بتایا گیا کہ تاجر رہنماؤں کاشف چوہدری، خواجہ سلمان صدیقی، شرجیل میر و دیگر نے ٹیکس نظام پر موقف پیش کیا۔تاجر رہنماؤں کا موقف ہے کہ کسی صورت ظالمانہ ٹیکسز قبول نہیں کریں گے۔