سپیکر خیبرپختونخوا اسمبلی سے الیکشن کمیشن کے وفد کی ملاقات، انتخابی ضابطہ اخلاق، انتظامی تیاریوں اور شفاف انتخابی عمل سے متعلق امور پر تبادلہ خیال

منگل 15 جولائی 2025 20:10

پشاور (اُردو پوائنٹ اخبارتازہ ترین - اے پی پی۔ 15 جولائی2025ء) سینیٹ انتخابات 2025 کے حوالے سے سپیکر خیبرپختونخوا اسمبلی بابر سلیم سواتی سے الیکشن کمشنر خیبرپختونخوا کی قیادت میں الیکشن کمیشن کے وفد نے سپیکر چیمبر میں ملاقات کی۔ ملاقات میں انتخابی ضابطہ اخلاق، انتظامی تیاریوں اور شفاف انتخابی عمل سے متعلق امور پر تبادلہ خیال کیا گیا۔اس ملاقات میں قائد حزبِ اختلاف خیبرپختونخوا اسمبلی ڈاکٹر عباد اللہ بھی سپیکر کے ہمراہ موجود تھے۔

(جاری ہے)

الیکشن کمیشن کے وفد نے خیبرپختونخوا اسمبلی سے سینیٹ انتخابات کے دوران مکمل تعاون کی درخواست کی اور اس بات پر زور دیا کہ انتخابی عمل آئینی، قانونی اور ضابطہ اخلاق کے مطابق پُرامن انداز میں مکمل ہونا چاہیے۔سپیکر خیبرپختونخوا اسمبلی نے یقین دہانی کرائی کہ اسمبلی الیکشن کمیشن کے ساتھ ہر ممکن تعاون کرے گی اور سینیٹ انتخابات کے لیے منصفانہ، شفاف اور باوقار ماحول فراہم کیا جائے گا۔ ان کا کہنا تھا کہ خیبرپختونخوا کی جمہوری روایات کو برقرار رکھتے ہوئے انتخابی عمل کو پُرامن اور مؤثر بنایا جائے گا۔