سعودی وزارت حج کے عمرہ زائرین کےلئے رہنما اصول جاری

بدھ 16 جولائی 2025 11:00

ریاض (اُردو پوائنٹ اخبارتازہ ترین - اے پی پی۔ 16 جولائی2025ء) سعودی وزارتِ حج و عمرہ نے زائرینِ حرمین کی آسانی کے لئے رہنما اصول جاری کیے ہیں تاکہ وہ آرام سے عمرہ ادا کر سکیں۔ اردو نیوز کے مطابق وزارتِ حج وعمرہ کی جانب سے عمرہ زائرین کو کہا گیا کہ مسجد الحرام میں عمرہ کی ادائیگی کے لئے آپ کا پرسکون ہونا انتہائی اہم ہے۔اپنے ہمراہ غیرضروری اشیا رکھنے سے آپ کی توجہ ان کی جانب مائل ہو سکتی ہے، آپ کی توجہ بٹ جانے کا اندیشہ ہوتا ہے۔

(جاری ہے)

وزارت کا کہنا ہے کہ آپ کی سیفٹی پہلے ہے، ایک چھوٹا سا پرس نما بیگ اپنے ساتھ رکھیں جس میں شناختی دستاویز، موبائل کے ساتھ ماسک، سیٹائزنگ ٹشو پیک موجود ہو، اس سے زیادہ اشیا نہ رکھیں۔ بیگ کا سائز بڑا ہونے کی صورت میں زائرین کو اسے سنبھالنا مشکل ہو جاتا ہے جس سے انہیں مشکل کا سامنا کرنا پڑتا ہے۔ واضح رہے کہ مسجد الحرام کے بیرونی صحنوں میں لاکرز موجود ہیں جہاں زائرین مسجد الحرام میں داخل ہونے سے قبل اپنا اضافی سامان بحفاظت وہاں رکھوا سکتے ہیں تاہم بہتر ہوگا کہ وہ اپنا سامان کمرے میں رکھیں تاکہ یکسو ہو کر عبادت کر سکیں۔