بھکر ،پولیس اپنے ہر شہری کے لیے انصاف تحفظ و عزت کی علمبردار ہے کھلی کچہری عوامی ریلیف کے لیے تسلسل سے جاری رہے گی ،ڈی پی او

جمعرات 17 جولائی 2025 16:30

بھکر (اُردو پوائنٹ اخبارتازہ ترین - اے پی پی۔ 17 جولائی2025ء) وزیراعلی پنجاب محترمہ مریم نواز صاحبہ کی اوپن ڈور پالیسی کے ویژن کے تحت ڈی پی او بھکر نے تھانہ سٹی و تھانہ صدر بھکر میں کھلی کچہری کا انعقاد کیا،پولیس ترجمان کے مطابق ڈسٹرکٹ پولیس آفیسر بھکر شہزاد رفیق اعوان نے آج تھانہ سٹی اور تھانہ صدر بھکر میں کھلی کچہری کا انعقاد کیا، جس میں شہریوں کی بڑی تعداد نے شرکت کی۔

اس موقع پر ڈی پی او بھکر نے فرداً فرداً عوامی مسائل سنے، شکایات کا بغور جائزہ لیا اور متعلقہ افسران کو فوری اور شفاف کارروائی کے احکامات جاری کیے۔ کھلی کچہری کا مقصد عوام اور پولیس کے درمیان اعتماد سازی کو فروغ دینا اور فوری انصاف کی فراہمی کو یقینی بنانا ہے۔ڈی پی او بھکر نے کہا پولیس عوام کی محافظ ہے اور ہر مظلوم کی آواز سنی جائے گی، میرے دفتر اور تھانوں کے دروازے ہر سائل کے لیے 24 گھنٹے کھلے ہیں، انصاف کا حصول سب کا حق ہے۔

(جاری ہے)

انہوں نے افسران کو ہدایت کی کہ عوامی شکایات کو ترجیحی بنیادوں پر حل کیا جائےانصاف کی بروقت فراہمی کو یقینی بنایا جائے سائلین کے ساتھ خوش اخلاقی سے پیش آیا جاۓ۔کھلی کچہری کے دوران شہریوں نے پولیس کے اس اقدام کو سراہا اور ڈی پی او بھکر کے عوام دوست رویے پر اعتماد کا اظہار کیا۔ڈی پی او نے مزید کہا کہ بھکر پولیس اپنے ہر شہری کے لیے انصاف، تحفظ اور عزت کی علمبردار ہے۔ کھلی کچہریاں عوامی ریلیف کے لیے تسلسل سے جاری رہیں گی۔\378