عراق میں مارکیٹ اور ریستوران آتشزدگی سے 60 افراد جاں بحق ہوگئے

مزید لاشیں ملبے کے نیچے دبی ہوئی ہیں جنہیں نکالا نہیں جا سکا‘کئی افراد لاپتہ ہیں. امدادی کارکن

میاں محمد ندیم جمعرات 17 جولائی 2025 15:37

عراق میں مارکیٹ اور ریستوران آتشزدگی سے 60 افراد جاں بحق ہوگئے

بغداد(اردوپوائنٹ اخبارتازہ ترین-انٹرنیشنل پریس ایجنسی۔17 جولائی ۔2025 )عراق کے مشرقی شہر کوت میں ایک ہائپر مارکیٹ اور ریستوران میں لگنے والی خوفناک آگ نے تباہی مچا دی، جس کے نتیجے میں کم از کم 60 افراد جاں بحق اور متعدد لاپتہ ہو گئے ہیں رپورٹ کے مطابق شہر کے محکمہ صحت اور پولیس ذرائع نے بتایا ہے کہ عراق کے مشرقی شہر کوت میں ایک ہائپر مارکیٹ اور ریستوران میں لگنے والی شدید آگ کے نتیجے میں کم از کم 60 افراد جاں بحق ہو گئے ہیں، جب کہ متعدد افراد لاپتہ بھی ہیں.

(جاری ہے)

کوت شہر کے محکمہ صحت کے ایک اہلکار نے برطانوی نشریاتی ادارے کو بتایا کہ اب تک 59 افراد کی شناخت ہو چکی ہے لیکن ایک لاش بری طرح جھلس چکی ہے جس کی شناخت ممکن نہیں ہو سکی شہر کے ایک اور اہلکار علی المیاحی نے کہا کہ ابھی مزید لاشیں ملبے کے نیچے دبی ہوئی ہیں جنہیں نکالا نہیں جا سکا سوشل میڈیا پر شیئر ہونے والی ویڈیوز میں دیکھا جا سکتا ہے کہ پانچ منزلہ عمارت شعلوں کی لپیٹ میں ہے، جب کہ فائر بریگیڈ کی ٹیمیں رات بھر آگ بجھانے کی کوششوں میں مصروف رہیں.

واسط صوبے کے گورنر محمد المیاحی نے واقعے کو المناک المیہ اور قومی سانحہ قرار دیا ان کے مطابق آگ رات کے وقت پانچ منزلہ عمارت میں لگی، جہاں شہری خریداری اور کھانے میں مصروف تھے انہوں نے بتایا کہ فائر بریگیڈ نے متعدد افراد کو بچا لیا اور آگ پر قابو بھی پا لیا. واقعے کے بعد تین روزہ سوگ کا اعلان کر دیا گیا ہے اور تحقیقات کا آغاز ہو چکا ہے جس کی رپورٹ 48 گھنٹوں کے اندر جاری کی جائے گی عراقی نشریاتی ادارے کے مطابق گورنر محمد المیاحی نے بتایا کہ واقعے کے بعد عمارت اور مال کے مالک کے خلاف مقدمات درج کر دیے گئے ہیں.