کراچی؛ لوٹ مار کرکے فرار ہونے والا ڈاکو شہری کی فائرنگ سے مارا گیا

ڈاکو ہوٹل پر بیٹھے افراد سے واردات کے بعد فرار ہو رہے تھے کہ شہری نے عقب سے فائرنگ کردی، عینی شاہد

جمعہ 18 جولائی 2025 13:10

کراچی (اُردو پوائنٹ اخبارتازہ ترین - این این آئی۔ 18 جولائی2025ء)شہر قائد میں لوٹ مار کرکے فرار ہونے والا ڈاکو شہری کی فائرنگ سے مارا گیا۔پولیس کے مطابق یاسین آباد شمیم آرکیڈ کے قریب لوٹ مار کر کے فرار ہونے والے ڈاکو کو شہری نے فائرنگ کر کے ہلاک ہوگیا۔ عزیزآباد تھانے کے علاقے بلاک 8 یاسین آباد شمیم آرکیڈ شیل پمپ کے قریب جمعرات اور جمعہ کی درمیانی شب فائرنگ سے ایک شخص جاں بحق ہوگیا ، جس کی لاش عباسی شہید اسپتال منتقل کی گئی ۔

(جاری ہے)

عزیز آباد تھانے کے انٹیلی جنس افسر کے مطابق مارا جانے والا شخص مبینہ ڈاکو ہے جو شہری کی فائرنگ سے ایک ہلاک ہوا ہے ، جس کی شناخت 25 سالہ شہزاد خان ولد ہزار خان کے نام سے کی گئی ۔عینی شاہد نے انٹیلی جنس افسر کو بتایا کہ موٹرسائیکل سوار 3 ڈاکو مبارک ہوٹل پر بیٹھے افراد سے لوٹ مار کر کے موٹرسائیکل پر واپس جا رہے تھے کہ اسی دوران ہوٹل پر بیٹھے ایک شہری نے اپنے پستول سے ڈاکووں پر عقب سے فائرنگ کی جس سے ایک ڈاکو کو 2 گولیاں لگیں اور وہ شیل پیٹرول پمپ کے قریب چلتی موٹرسائیکل سے نیچے گر گیا جب کہ اس کے 2 ساتھی موقع سے فرار ہونے میں کامیاب ہوگئے ۔عینی شاہد نے پولیس کو بتایا کہ فائرنگ کرنے والا شہری بھی موقع سے چلا گیا ۔ پولیس واقعے کی تحقیقات کر رہی ہے ۔