بارشی پانی نکاسی عمل فوری مکمل ،عوام کو سیلابی ریلوں سے آگاہی کیلئے وارننگ سسٹم مزید بہتر بنایا جائے،وزیراعلی پنجاب

لاہور (اُردو پوائنٹ اخبارتازہ ترین - اے پی پی۔ 18 جولائی2025ء) وزیراعلی پنجاب مریم نواز نے کہا ہے کہ ہر شہر میں بارشی پانی کی نکاسی کا عمل فورا مکمل کیا اور عوام کو سیلابی ریلوں سے بروقت آگاہ کرنے کے لئے وارننگ سسٹم کو مزید بہتر بنایا جائے۔ پی ڈی ایم اے ہیڈ کوارٹر میں گفتگو کرتے ہوئے انہوں نے ہدایت کی کہ ہر شہر میں پرائیویٹ سوسائٹیز کو بھی بارشی پانی کی بروقت نکاسی کا پابند بنایا اور ندی نالوں، نہروں و دریائوں میں نہانے پر پابندی یقینی بنائی جائے، عوام کو دریا وغیرہ میں نہانے پر پابندی سے آگاہی کرنے کے لئے مساجد میں اعلانات کرائیں جائیں، دیہاتوں میں مساجد کے لائوڈ سپیکرز کو ممکنہ سیلاب کی آگاہی کے لئے بھی استعمال کیا جائے۔

وزیراعلی نے کہا کہ بارشوں کے دوران ڈپٹی کمشنرز نکاسی آب مکمل ہونے تک فیلڈ میں خود موجود رہیں ، ندی نالوں میں سیلابی پانی کی روانی کے لئے صفائی اور تجاوزات کا خاتمہ بھی یقینی بنایا جائے۔

(جاری ہے)

وزیراعلی مریم نواز نے بارشوں کی وجہ سے ہونے والے نقصانات کی تفصیلات طلب کر لیں، وزیراعلی نے بارشوں کی وجہ سے انفراسٹرکچر، چاول اور دیگر فصلوں کے نقصانات کی تفصیل مہیا کرنے کا حکم بھی دیا اور انتظامیہ، متعلقہ اداروں کو بارش کے اگلے سپیل کی تیاری کرنے کی ہدایت کی۔

وزیراعلی مریم نواز نے سی اینڈ ڈبلیوڈیپارٹمنٹ سے روڈ انفراسٹرکچر کے نقصانات سے متعلق رپورٹ بھی طلب کی۔ وزیراعلی نے گفتگو کرتے ہوئے مزید کہا کہ بروقت تیاری کی وجہ سے طوفانی اور تاریخی بارش کے دوران نقصانات سے ممکنہ حد تک بچائو ممکن ہوا،جہاں کئی دنوں تک پانی کھڑارہتا تھا اب وہاں چند گھنٹوں میں پانی کی نکاس مکمل کر لیا گیا جبکہ ماضی میں نالہ لئی میں طغیانی کی وجہ سے ہزاروں لوگ متاثر ہوتے تھے لیکن اب کچھ وقت کے لئے کچھ علاقے متاثر ہوئے۔

وزیراعلی مریم نواز نے بتایا کہ ریلیف سرگرمیوں کے دوران نومولود بچے کو ریسکیو کرکے والدین کے سپر د کرنے کے عمل کو دیکھ کر جذباتی ہوگئی۔وزیراعلی نے کہا کہ ندی نالوں کی بروقت ڈی سیلٹنگ کرنے سے نقصانات سے بچائر ممکن ہوا، عوام بالخصوص بچوں کو برسات کے دوران ندی نالوں سے دور رہنا چاہیے،ہائی رسک علاقوں میں بروقت اقدامات یقینی بنائے جائیں، والدین بچوں کو مون سون کی طوفانی بارشوں کے دوران نہروں اور تالابوں میں نہانے سے منع کریں۔

وزیراعلی مریم نواز نے کہا کہ حکومتی اداروں نے اچھا کام کیا، غفلت یا کوتاہی کی وجہ سے کوئی ڈیتھ نہیں ہوئی، افسران اور ان کی ٹیم خودفیلڈ میں موجود رہی اور عوام کے جان ومال کے تحفظ کے لئے اپنی جان تک رسک میں ڈال دی۔انہوں نے کہا کہ صوبہ بھر میں جہاں بھی ضرورت ہو، پی ڈی ایم اے سے لائف جیکٹ، بوٹ اور دیگر سامان مہیا کریں گے، چھتیں، دیواریں گرنے اور دیگر وجوہات سے قیمتی انسانی جانوں کے ضیاع پر بے حد افسوس ہے۔