Live Updates

پاکستانی ایئرلائنز کی سعودی عرب کیلئے براہِ راست پروازوں کا آڈٹ مکمل

جمعہ 5 ستمبر 2025 20:10

کراچی (اُردو پوائنٹ اخبارتازہ ترین - این این آئی۔ 05 ستمبر2025ء) پاکستانی ایئرلائنز کی سعودی عرب کیلئے براہِ راست پروازوں کا آڈٹ مکمل کرلیا گیا ، گاکا کی دو ٹیمیں مرحلہ وار ایئرپورٹس آڈٹ کے لئے پہنچی تھیں۔تفصیلات کے مطابق سعودی جنرل اتھارٹی آف سول ایوی ایشن (گاکا) نے پاکستانی ایئرلائنز کی سعودی عرب کیلئے براہِ راست پروازوں کے سلسلے میں 6 ایئرپورٹس کا آڈٹ مکمل کرلیا ہے۔

ترجمان سول ایوی ایشن کے مطابق 7 ایئرپورٹس کے آڈٹ پلان میں سیالکوٹ ایئرپورٹ شامل تھا، تاہم سیلاب کے باعث وہاں آڈٹ نہیں ہو سکا۔گاکا کی دو الگ الگ ٹیموں نے مرحلہ وار آڈٹ کیا، پہلی ٹیم نے 25 سے 30 اگست تک لاہور، ملتان اور فیصل آباد ایئرپورٹ کا آڈٹ مکمل کیا، جبکہ یکم سے 4 ستمبر تک اسلام آباد، پشاور اور کراچی ایئرپورٹس کا آڈٹ دوسری ٹیم نے کیا۔

(جاری ہے)

آڈٹ میں ایئرپورٹ سیکیورٹی انوائرمنٹ، اے ایس ایف سیکیورٹی پروسیجرز و پروٹوکول، کارگو ہینڈلنگ، ایئرلائن فلائٹ پروسیجرز، ریگولیٹڈ ایجنٹ سیکیورٹی اور سرٹیفائیڈ فلائٹ کچن پروسیجرز کا جائزہ لیا گیا۔گاکا ٹیم نے ڈپٹی ڈی جی سول ایوی ایشن اتھارٹی سے بھی ملاقات کی اور آڈٹ سے متعلق تبادلہ خیال کیام اس دوران سول ایوی ایشن اتھارٹی (CAA) کی ٹیم نے سعودی حکام کو مکمل معاونت فراہم کی۔