امریکا میں مقیم بھارتی ڈاکٹر خواتین مریضوں کا جنسی استحصال کرنے پر گھر میں نظربند،کلینک سیل

اتوار 20 جولائی 2025 10:40

واشنگٹن (اُردو پوائنٹ اخبارتازہ ترین - اے پی پی۔ 20 جولائی2025ء) امریکی ریاست نیو جرسی میں مقیم بھارتی نژاد ڈاکٹر رتیش کلرا کو خواتین مریضوں کا جنسی استحصال کرنے پر گھر میں نظربند اور ان کا کلینک سیل کردیاگیا۔اردو نیو ز کے مطابق بھارتی نژاد ڈاکٹر پر میڈیکل فراڈ کے متعدد الزامات عائد کئے گئے ہیں، جن میں بغیر کسی جائز طبی مقصد کے مریضوں کو نشہ آور ادویات کا استعمال کرانا ، مریضوں سے نشہ آور ادویات کے نسخوں کے بدلے جنسی تعلقات کا مطالبہ کرنا ، اور نیوجرسی میڈیکیڈ کو مریضوں کو چیک کرنے کے جعلی بل ارسال کرنا شامل ہیں ۔

اردو نیوز کے مطابق 51 سالہ رتیش کلرا اس وقت گھر میں نظربند ہیں اور اُنہیں طب کے پیشے سے دُور رہنے اور دوا تجویز کرنے سے منع کر دیا گیا ہے۔

(جاری ہے)

کیس کا فیصلہ ہونے تک ان کا کلینک بھی بندرہے گا۔ان کے کئی سابق ملازمین نے بتایا کہ خواتین مریضوں نے شکایت کی کہ ڈاکٹر رتیش کلرا نے انہیں غیرمناسب انداز میں چُھونے اور نسخے کے بدلے جنسی تعلقات کا مطالبہ کیا۔

ڈاکٹر رتیش کلرا ایک ایسے مریض کو نشہ آور ادویات کے نسخے دیتے رہے جو ایسیکس کاؤنٹی کی جیل میں قید تھا اور اس کا ڈاکٹر سے کوئی رابطہ نہیں تھا۔ڈاکٹر رتیش کلرا پر ایسے مریضوں کو چیک کرنے اور ان کے کونسلنگ سیشنز کے بلز بھیجنے کا بھی الزام ہے جو کبھی اُن کے پاس آئے ہی نہیں تھے۔اس کیس کے حوالے سے امریکی اٹارنی جنرل علینہ حبہ نے کہا ہے کہ معالجین ایک انتہائی ذمہ دار مقام پر فائز ہوتے ہیں، لیکن الزامات کے مطابق ڈاکٹر رتیش کلرا نے اس مقام کو نشے کو فروغ دینے، کمزور مریضوں کا جنسی استحصال کرنے اور نیو جرسی کے عوامی صحت کے نظام کو دھوکہ دینے کے لئے استعمال کیا۔

اٹارنی جنرل نے مزید کہا کہ ڈاکٹر کلرا نے نہ صرف قوانین کی خلاف ورزی کی بلکہ مریضوں کی زندگیوں کو بھی خطرے میں ڈالا۔