وزیراعلی لاہور ڈویلپمنٹ پروگرام فیز-1 برق رفتاری سے آخری مراحل میں داخل، ترقیاتی کاموں کی مسلسل نگرانی جاری

پیر 21 جولائی 2025 18:04

لاہور (اُردو پوائنٹ اخبارتازہ ترین - اے پی پی۔ 21 جولائی2025ء) ڈپٹی کمشنر لاہور سید موسی رضا کی سربراہی میں ضلعی انتظامیہ لاہور شہر کی تعمیر و ترقی کے سفر میں ایک نئے دور کا آغاز کر چکی ہے،جہاں وزیر اعلیٰ پنجاب کے فلیگ شپ منصوبے،لاہور ڈویلپمنٹ پروگرام فیز 1پر عملدرآمد برق رفتاری سے جاری ہے اور منصوبہ تکمیل کے آخری مراحل میں داخل ہو چکا ہے۔

اس اہم پیش رفت کا جائزہ لینے کیلئے ڈپٹی کمشنر لاہور باقاعدگی سے ہفتہ وار اجلاسوں کی صدارت کر رہے ہیں تاکہ منصوبے کی بروقت اور معیاری تکمیل میں کوئی رکاوٹ نہ آئے۔انتظامیہ نے اس میگا پراجیکٹ کو پائیدار ترقی کی جانب ایک اہم سنگ میل قرار دیتے ہوئے تمام ترقیاتی کاموں میں شفافیت اور اعلیٰ معیار کو اپنی اولین ترجیح بنایا ہے۔

(جاری ہے)

ڈی سی سید موسی رضا نے واضح ہدایات جاری کی ہیں کہ تعمیراتی کاموں کے معیار پر کوئی سمجھوتہ نہیں کیا جائے گا تاکہ ان منصوبوں کے ثمرات سے شہری طویل عرصے تک مستفید ہو سکیں۔

اس مقصد کے حصول کیلئے تمام اسسٹنٹ کمشنرز کو اپنے اپنے علاقوں میں جاری کاموں کی ذاتی طور پر کڑی نگرانی کرنے کا پابند کیا گیا ہے جبکہ ٹھیکیداروں کو منصوبے مقررہ مدت میں مکمل کرنے کی ہدایت کی گئی ہے۔ضلعی انتظامیہ کا عزم ہے کہ وزیر اعلیٰ پنجاب کے ترقیاتی وژن کو حقیقت کا روپ دینے اور شہریوں کی فلاح و بہبود کیلئے تمام وسائل بروئے کار لائے جائیں گے۔