عالمی ادارہ صحت نے اسرائیلی فوج کی جانب سے غزہ میں ان کے مراکز پر حملوں کی شدید مذمت

منگل 22 جولائی 2025 08:50

جنیوا (اُردو پوائنٹ اخبارتازہ ترین - اے پی پی۔ 22 جولائی2025ء) عالمی ادارہ صحت نے اسرائیلی فوج کی جانب سے غزہ میں اس کے مراکز پر حملوں کی شدید مذمت کی ہے۔العربیہ کے مطابق عالمی ادارہ خوراک کا کہنا ہے کہ اسرائیلی فوج نے سوموار کے روز غزہ کے وسط میں واقع دير البلح میں اس کے عملے کے رہائشی مقام اور مرکزی گودام پر تین بار حملے کئے ۔ادارے کے سربراہ ڈاکٹر ٹیڈروس ایڈہا نوم نے اپنی ٹویٹ میں بتایا کہ اسرائیلی فوج نے دير البلح میں عالمی ادارہ صحت کے عملے کے رہائشی مقام پر تین بار دھاوا بولا اور مرکزی گودام کو بھی نشانہ بنایا۔

انہوں نے بتایا کہ اسرائیلی فوج نے عملے کے ایک مرکز میں گھس کر خواتین اور بچوں کو پیدل جنوب کی طرف جانے پر مجبور کیا۔ ساتھ ہی مرد عملے اور ان کے اہل خانہ کو ہاتھ پاؤں باندھ کر کپڑے اتار کر موقع پر تفتیش کی اور ان پر بندوقیں تانیں۔

(جاری ہے)

ٹیڈروس کے مطابق 32 افراد کو محفوظ مقام پر منتقل کر دیا گیا، لیکن اسرائیلی فوج نے عملے کے دو ارکان اور ان کے دو اہل خانہ کو حراست میں لے لیا۔

تین کو بعد میں رہا کر دیا گیا جبکہ ایک اب بھی گرفتار ہے۔ادارے نے فوری رہائی اور عملے کی مکمل حفاظت کا مطالبہ کیا ہے۔یڈروس نے خبردار کیا کہ دير البلح میں جاری ایواکیوئیشن کی کارروائیوں نے عالمی ادارہ صحت کی کئی تنصیبات کو متاثر کیا ہے، جس سے غزہ میں صحت کا نظام مزید کمزور ہو رہا ہے۔واضح رہے یہ بیان ایسے وقت آیا ہے جب دير البلح میں شدید فضائی حملے جاری ہیں اور اسرائیلی فوج نے علاقے کو خالی کرانے کا انتباہ دے رکھا ہے تاکہ اپنی زمینی کارروائی کو وسعت دے سکے۔ یہ علاقہ جنگ کے آغاز سے اب تک زمینی حملوں سے محفوظ تھا۔