بابوسر ریسکیو آپریشن مکمل، 250 سیاح محفوظ مقامات پر منتقل، 10 سے 15 تاحال لاپتہ

ریسکیو، ضلعی انتظامیہ، پولیس، مقامی رضاکاروں اور پاک فوج کی مدد سے مشترکہ سرچ آپریشن لاپتا افراد کے ملنے تک جاری رہے گا؛ ترجمان گلگت بلتستان حکومت کا بیان

ساجد علی بدھ 23 جولائی 2025 11:21

بابوسر ریسکیو آپریشن مکمل، 250 سیاح محفوظ مقامات پر منتقل، 10 سے 15 تاحال ..

سکردو ( اُردو پوائنٹ اخبارتازہ ترین۔ 23 جولائی 2025ء ) کلاؤڈ برسٹ اور لینڈ سلائیڈنگ سے متاثرہ علاقے بابوسر میں ریسکیو آپریشن مکمل کرتے ہوئے 250 سیاحوں کو محفوظ مقامات پر منتقل کردیا گیا تاہم 10 سے 15 تاحال لاپتہ ہیں۔ میڈیا رپورٹس کے مطابق شاہراہ بابوسر پر شدید بارشوں کے باعث پھنس جانے والے تمام سیاحوں اور مسافروں کو بحفاظت ریسکیو کر لیا گیا ہے، گلگت بلتستان حکومت کے ترجمان فیض اللہ فراق نے تصدیق کی ہے کہ ریسکیو آپریشن کامیابی سے مکمل ہوا اور تقریباً 250 سیاحوں کو محفوظ مقامات پر منتقل کر دیا گیا تاہم کچھ افراد تاحال لاپتہ ہیں جن کی تلاش کے لیے سرچ آپریشن جاری ہے، عینی شاہدین کے مطابق 10 سے 15 افراد کا تاحال کچھ پتہ نہیں چلا۔

ترجمان گلگت بلتستان حکومت کا کہنا ہے کہ وزیر اعلیٰ گلگت بلتستان کی ہدایت پر ریسکیو، ضلعی انتظامیہ، پولیس، مقامی رضاکاروں اور پاک فوج کی مدد سے مشترکہ سرچ آپریشن لاپتا افراد کے ملنے تک جاری رہے گا، چلاس میں سیاحوں کے لیے مفت رہائش کا بندوبست کر دیا گیا ہے، مقامی آبادی کے نقصانات کا بھی تخمینہ لگایا جا رہا ہے، رات کی تاریکی میں سرچ آپریشن میں دشواریوں کا سامنا ہوتا ہے اس لیے کارروائی کو دن کی روشنی میں دوبارہ شروع کیا جاتا ہے۔

(جاری ہے)

انہوں نے بتایا کہ مختلف فوٹیجز میں دکھائی دینے والی تمام گاڑیوں کے سیاح محفوظ ہیں، ضلع استور کے علاقے بولن میں سیلابی ریلوں نے تباہی مچائی جس کے نتیجے میں ایک خاتون جاں بحق ہوئی، دیوسائی میں پھنسے تمام سیاحوں کو بھی ریسکیو کر لیا گیا ہے، دیامر تھور اور ضلع غذر میں ریلیف اور امدادی سرگرمیاں تیزی سے جاری ہیں، مون سون بارشوں کے پیش نظر 25 جولائی تک مزید خطرات ہیں جس کیلئے انتظامیہ کو الرٹ رہنے کی ہدایت کردی گئی۔