دہشتگردی کے خلاف جنگ میں مدد فراہم کی جائے، طلال چوہدری کی واٹس ایپ سے اپیل

بدھ 23 جولائی 2025 17:17

اسلام آباد(اُردو پوائنٹ اخبارتازہ ترین - این این آئی۔ 23 جولائی2025ء)وزیرِ مملکت برائے داخلہ طلال چوہدری نے عالمی برادری اور واٹس ایپ سے اپیل کی ہے کہ پاکستان کو دہشت گردی کے خلاف جنگ میں مدد فراہم کی جائے، انہوں نے عوام کو خبردار کیا ہے کہ دہشت گرد گروہ واٹس ایپ چینلز کو نفرت انگیز مواد اور خطرناک بیانیہ پھیلانے کیلئے استعمال کر رہے ہیں۔

(جاری ہے)

سماجی رابطے کی ویب سائٹ ایکس پر جاری کردہ بیان میں طلال چوہدری نے کہا کہ اقوام متحدہ اور امریکا کی جانب سے کالعدم قرار دی گئی تنظیم تحریکِ طالبان پاکستان (ٹی ٹی پی) اپنے واٹس ایپ چینلز چلا رہی ہے اور بڑے پیمانے پر پیغامات بھیج رہی ہے تاکہ اپنے پٴْرتشدد اور نفرت انگیز نظریے کو پھیلایا جا سکے، اپنے خطرناک بیانیے کو عام کیا جا سکے اور دہشت گرد سرگرمیوں کی تعریف کی جا سکے۔وزیرِ مملکت نے کہا کہ یہ اکاؤنٹس فوری طور پر بند کیے جائیں اور ایسے نمبر یا اکاؤنٹس شناخت کرکے خودکار طریقے سے معطل کرنے کے لیے ضروری الگورتھمز بنائے جائیں۔