ضلعی انتظامیہ کا چینی کی سرکاری قیمت سے زائد وصول کرنے والوں کے خلاف کریک ڈائون، 39 افراد گرفتار، 761000 روپے جرمانہ عائد

بدھ 23 جولائی 2025 17:10

راولپنڈی (اُردو پوائنٹ اخبارتازہ ترین - اے پی پی۔ 23 جولائی2025ء) ضلعی انتظامیہ کی جانب سے چینی کی سرکاری قیمت 173 روپے فی کلو سےزائد وصول کرنے والوں کے خلاف کریک ڈائون جاری ہے۔ گزشتہ چوبیس گھنٹوں کے دوران کی جانے والی کارروائیوں میں ڈویژن بھر میں مختلف مقامات پر چیکنگ کے دوران 139 خلاف ورزیاں رپورٹ ہو نے پر 7,61,000 روپے کا جرمانہ، 02 ایف آئی آرز، 39 افراد گرفتار اور 33 پوائنٹس سیل کیے گئے۔

تفصیلات کے مطابق ضلع راولپنڈی میں چیکنگ کے دوران 64 خلاف ورزیاں سامنے آئیں۔ اس پر ایکشن لیتے ہوئے 5,42,500 روپے کا جرمانہ, 02 ایف آئی آر، 28 افراد گرفتار اور 26 عمارتیں سیل کی گئیں۔ ضلع اٹک میں چیکنگ کے دوران 22 خلاف ورزیوں پر 89000 جرمانہ، 10افراد گرفتار اور 02 عمارتیں سربمہر ہوئیں۔

(جاری ہے)

ضلع جہلم میں 26 خلاف ورزیوں پر مجموعی طور پر 44,000 جرمانہ اور 05 عمارتیں سیل کیں گئیں۔

اسی طرح ضلع چکوال میں انسپکشنز کے دوران 08 افراد کو مجموعی طور پر 64,000 روپے کا جرمانہ عائد کیا گیا۔ ضلع مری میں 19 افراد کو خلاف ورزی میں ملوث پاتے ہوئے مجموعی طور پر 21,500 روپے کا جرمانہ اور ایک شخص کو گرفتار کیا گیا۔کمشنر راولپنڈی ڈویژن انجینئر عامر خٹک نے ہدایت کی کہ ڈپٹی کمشنرز شوگر ملز سے سپلائی چین کے ساتھ ساتھ اس بات کو یقینی بنائیں کہ ملز چینی کو نوٹیفائیڈ ریٹ پر فروخت کریں۔

انہوں نے کہا کہ وزیر اعلی پنجاب مریم نواز شریف کی ہدایت پر چینی نوٹیفائیڈ ریٹ کی خلاف ورزی کرنے والوں پر کریک ڈاؤن تیز کریں، چینی مافیا کو عوام کا استحصال کرنے کی اجازت نہیں دی جائے گی،تمام مجسٹریٹس کو ہدایت کی جائے کہ وہ فیلڈ میں رہتے ہوئے اشیاء ضروریہ کی قیمتوں کے ساتھ ساتھ مہنگی چینی بیچنے والے دکانداروں کے خلاف بلا امتیاز کاروائی عمل میں لائیں نیز نوٹیفائڈ ریٹ سے زائد قیمت وصول کرنے والوں کی گرفتاریاں یقینی بنائی جائیں، ڈی سی کاؤنٹرز پر تمام اشیاء ضروریہ کی موجودگی اور ان کی کوالٹی کو یقینی بنایا جائے۔